Almatyda búginnen bastap kınoteatrlar jumysyn toqtatty
ALMATY. QazAqparat - Almatyda koronavırýsqa baılanysty búginen bastap teatrlar men kınoteatrlar jabylady. Bul týraly Almaty qalasy ákiminiń orynbasary Erjan Babaqumarov qoǵamdyq keńestiń otyrysynda aıtty, dep habarlaıdy QazAqparat tilshisi.
«Búginnen bastap qalanyń teatrlary men kınoteatrlary jabylady. Barlyq bilim berý, mádenıet jáne sport uıymdarynda, demalys ortalyqtarynda, meshitterde epıdemııaǵa qarsy sharalar kúsheıtiledi», - dedi ol.
Qala ákiminiń orynbasary sońǵy eki apta ishinde sanıtarlyq jumystar men profılaktıkalyq sharalar júrgizilgenin jáne bul jumysty kúsheıtý úshin eriktilerdiń qoldaýy qajet ekenin tilge tıek etti.
«13 naýryzdan bastap memleket esebinen ótkiziletin barlyq mádenı-sporttyq jáne basqa da buqaralyq is-sharalar toqtatylady. Jeke otyrystar boıynsha qatysýshylardyń sanyn azaıtýǵa keńes beremiz», - dep tolyqtyrdy Erjan Babaqumarov.
