Almatyda búgingi jaýyn-shashyn saldarynan eki aýdannyń aýmaǵyn sý basty
Almaty ákimdiginiń málimetinshe, atalǵan eki aýdanda sý basý deregi shuǵyl túrde joıyldy. Qazir jaǵdaı tolyq baqylaýda.
«Almaly aýdanyna tıisti ýchaskede júrgizilip jatqan jol jóndeý jumystary men jıektastarda jańbyr sýyn aryq jelisine jiberetin sańylaýlardyń ýaqytsha bolmaýyna baılanysty qysqamerzimdi sý basý deregi anyqtaldy. Jóndeý jumystary aıaqtalǵan soń jıektastarda sańylaýlar jasalady. Naýryzbaı aýdanynyń ákimdigi «Alma sıtı» turǵyn úı kesheninde sý basý deregin joıý boıynsha jedel jumys júrgizdi. Saǵat 18.50 - de «RBS Dorstroı» JShS merdigerlik uıymy men qyzmet kórsetetin kompanııanyń kúshimen sý basý deregi joıyldy. Qazir kóshe jelilerine qosý arqyly TK aýmaǵynan sý burý máselesi pysyqtalyp jatyr», - dep habarlady ákimdikten.
Jalpy, «Qazseldenqorǵaý» mekemesiniń málimeti boıynsha taý ózenderi boıynsha jaǵdaı turaqty. Sý basý deregi anyqtalǵan ýchaskelerde aýdan ákimdikteriniń kommýnaldyq qyzmetteri jumys júrgizip jatyr.
Eske salsaq, búgingi jaýyn-shashyn saldarynan Almatyda qala turǵyndary jınalǵan sýǵa maltyp júrgenin jazǵanbyz.