Almatyda búgin órt saldarynan zardap shekken turǵyn úıde jóndeý jumystary bastaldy
ALMATY. QazAqparat - Búgin Almatyda «Korova bar» dámhanasynda shyqqan órt saldarynan zardap shekken 7 qabatty turǵyn úıdiń páterleri men balkondaryn qalpyna keltirý jumystary bastaldy. Bul týraly Almaty qalasy ákiminiń baspasóz qyzmetinen habarlady.
Abylaıhan dańǵyly 74/60 mekenjaıynda ornalasqan jeti qabatty turǵyn úıge «Vernyı» páter ıeleri kooperatıvi qyzmet kórsetedi.
«Sońǵy málimet boıynsha, órt saldarynan №5 jáne №6-shy kireberistiń páterleri, sondaı-aq, №4-shi kireberistiń balkondary zardap shekti. Barlyǵy 23 páterdi órt shalǵan. Olardyń ishinde 7 páterge qatty nuqsan keltirilse, qalǵan 16 páterdi jartylaı ǵana órt shalǵan. ıAǵnı, balkondary janyp, terezeleri synǵan. Barlyǵy 120 adam evakýatsııalandy, olardyń ishinde 8 bala bar. Bir adam ýytty gazǵa ýlaný nyshanymen Jedel medıtsınalyq kómek kórsetý aýrýhanasyna jetkizildi», - delingen habarlamada.
Qazirgi sátte osy úıdiń turǵyndary keltirilgen shyǵyndy ótetý, páterlerdi jáne turǵyn úıdiń syrtqy kelbetin qalpyna keltirý boıynsha aryzdar tapsyryp jatyr. Keltirilgen shyǵyndardy esepteý jumystary qolǵa alyndy. Kireberister men balkondardy qalpyna keltirý, jóndeý jumystary bastalyp ta ketti.
Oqıǵa ornynda shatyrlyq qalashyq boı kóterdi. Ol jerde zardap shekkenderge №1-shi emhananyń dárigerleri, psıhologtar kómek kórsetip jatyr. Jedel medıtsınalyq kómek brıgadasy kezekshilik etýde jáne osy jerde gýmanıtarlyq kómek kórsetý pýnkti ashyldy. «Dastarhan» ashana jelisi turǵyndardy úsh mezgil tamaqpen qamtamasyz etýde.
№54-shi mektep-gımnazııada zardap shekkenderdi ýaqytsha qabyldaý pýnkti ashyldy.
Sondaı-aq, oqıǵa ornynda Almaly aýdany ІІB tergeý-jedel toby jumys istep jatyr.
