Almatyda búgin koronavırýs anyqtalǵan eki er adamnyń jaǵdaıy aýyr
ALMATY. QazAqparat - 11 sáýir tańerteń Almatyda COVID-19 vırýsyn juqtyrǵan 5 jańa jaǵdaı tirkeldi, dep habarlaıdy QazAqparat coronavirus2020.kz silteme jasap.
Qalada koronavırýs ınfektsııasyn juqtyrýǵa qatysty jalpy 128 oqıǵa tirkelgen.
5 jańa jaǵdaı buǵan deıin COVID-19 juqtyrǵan jergilikti naýqastarmen baılanysta bolǵan adamdardan anyqtaldy. Olardyń ekeýi – áıel, úsheýi –er adam.
Eki er adamnyń jaǵdaıy polısegmentti pnevmonııaǵa baılanysty aýyr dep baǵalandy. Qalǵan patsıentterdiń jaǵdaıy – qanaǵattanarlyq.
Olarmen baılanysta bolǵan barlyq adam izdestirilýde, karantınge jatqyzylady.
Búginde ınfektsııalyq statsıonarda KVI-men aýyrǵan 99 adam (1 oblystan) jatyr. Onyń ishinde 4 bala bar. 71 naýqastyń jaǵdaıy qanaǵattanarlyq, 7-ýi - aýyr, 21 patsıenttiń jaǵdaıy – ortasha aýyr (bireýi oblystan).
Koronavırýs ınfektsııasynan 28 patsıent saýyǵyp, aýrýhanadan shyǵaryldy.
2 naýqas kóz jumdy.
Megapolıstiń ýaqytsha ortalyqtarynda 138 adam bar, olardyń 9-y – bala, 368-i – karantındik oqshaýlaýda, 5 334 adam – úı karantıninde.
