Almatyda BRT jelisine 18 metrlik avtobýstar shyqty
ALMATY. QazAqparat - Almaty ákimi Baýyrjan Baıbek búgin jumys sapary kezinde BRT jelisine jańa baǵyttar boıynsha shyǵatyn syıymdylyǵy joǵary 18 metrlik avtobýstardy kórdi, dep habarlaıdy QazAqparat tilshisi.
Jolaýshylar aǵynynyń artýyna oraı BRT jelisinde №205 jańa baǵyt ashyldy, mundaǵy kólik Mustafın - Rysqulbekov - Súleımenov - Jandosov - Tımırıazev - Jeltoqsan (keri baǵytta Naýryzbaı batyr) - Tóle bı kóshelerin, Shyǵys aınalma jolyn jáne «Jetisý» bazaryn qamtıdy.
Bul baǵyt boıynsha qyzmet kórsetý úshin 30 jańa kólik ár 5 mınýt saıyn jolǵa shyǵyp otyrady. Tómen edendi avtobýstardyń syıymdylyǵy 180 adamnan asady. Kólikter kondıtsıonerlermen, vıdeobaqylaý kameralarymen, eńkeıgish kýzovpen jabdyqtalǵan. Ári ekologııalyq standarttarǵa saı Evro-5 janarmaıymen júredi.
18 metrlik avtobýstyń tórt esiginiń árqaısysyna «OŃAI» termınaly ornatylǵan.
«Qala basshylyǵynyń qoǵamdyq kóliktegi servıs sapasyn arttyrýǵa qatysty tapsyrmasyna oraı qazirdiń ózinde 600 júrgizýshi biliktilik Ortalyǵynda kásibı sheberlikterin jetildirýde. Jol erejesi jáne kúızelistiń aldyn alý, alǵashqy medıtsınalyq kómek kórsetý, jolaýshylarǵa mádenıetti qyzmet kórsetý boıynsha trenıngter ótýde», - dedi Almaty ákiminiń orynbasary Erlan Áýkenov.
Qalanyń Kólik holdınginiń basshysy Sadır Hamraevtyń aqparaty boıynsha ótken qazan aıynda «OŃAI» kartasy boıynsha 31 mıllıon tranzaktsııalanǵan. Bul osy ýaqytqa deıingi rekordtyq kórsetkish.
Aıta keterligi, jyl aıaǵyna deıin Almatyda qoǵamdyq kóliktiń úlesi 87 paıyzǵa jetetin bolady. Ótken aptada qalaǵa taǵy 200 jańa avtobýs kelgen bolatyn.
