Almatyda breın-rıng boıynsha qalalyq ashyq týrnır ótedi
ALMATY. 2 aqpan. QazAqparat /Erlik Erjanuly/ - Almatyda 4-5 aqpan kúnderi breın-rıng boıynsha «Ál-Farabı atyndaǵy QazUÝ ashyq kýbogy» qalalyq zııatkerlik týrnıri bolady.
Ony ýnıversıtettegi stýdentterdiń ǵylymı qoǵamy uıymdastyryp otyr. Bul básekege Ál-Farabı atyndaǵy QazUÝ, Q.Sátbaev atyndaǵy QazUTÝ, T. Rysqulov atyndaǵy QazEÝ, S. Asfendııarov atyndaǵy QazUMÝ, Abaı atyndaǵy QazUPÝ, T. Júrgenov atyndaǵy QazUÓA, Qurmanǵazy atyndaǵy Qazaq ulttyq konservatorııasy, Qazaq-Brıtan tehnıkalyq ýnıversıteti, Qazaq menedjment, ekonomıka jáne boljaý ınstıtýty jáne basqa da joǵary oqý oryndary óz komandalaryn qospaq. Onda Almaty qalasyndaǵy oqý ordalarynyń 16 komandasy «A» lıgasynda, al ózge 32 komanda «Á» lıgasynda óner kórsetkeli otyr.
Ál-Farabı atyndaǵy QazUÝ stýdentteri ǵylymı qoǵamynyń tóraıymy Gúlmaral Mahabildiń aıtýynsha, bul týrnırdiń maqsaty - daryndy jastardy qoldaý, jastardyń shyǵarmashylyq jáne zııatkerlik damýyna jaǵdaı jasaý, talapty jastardyń qalyptasýyna kómektesý. Zııatkerlik shyǵarmashylyǵynyń áleýmettik mártebesin joǵarylatý, olardyń qabiletterin, erýdıtsııasyn, logıkalyq oılaýyn damytý, jastar arasyndaǵy ózara shyǵarmashylyq-zııatkerlik baılanysty jaqsartý, sondaı-aq, jastardyń zııatkerlik qaýymdastyǵyn uıymdastyryp, birlesip jetildirý jáne Almaty qalasyndaǵy joǵary oqý oryndarynyń stýdenttik uıymdary arasyndaǵy áriptestikti nyǵaıtý.
