Almatyda «Boztorǵaı» balalar shyǵarmashylyǵynyń halyqaralyq baıqaýy ótedi
ALMATY. Mamyrdyń 27-si. QazAqparat /Názıra Eleýhan/ - Almatyda mamyrdyń 25-i men maýsymnyń 1-i aralyǵynda, balalar kúni merekesine oraı, XII-shi Halyqaralyq «Boztorǵaı» balalar shyǵarmashylyǵynyń baıqaýy ótedi. Bul týraly búgin Almatyda ótken arnaıy baspasóz máslıhatynda baıqaýdy uıymdastyrýshy komıtet ókilderi málim etti,
dep habarlaıdy QazAqparat.
Konkýrs jyldaǵydaı Almaty qalasynyń Ortalyq demalys saıabaǵyndaǵy ashyq alańda bolady. Bıylǵy jyly sharaǵa barlyq aımaqtardan jáne Qyrǵyzstan, Ózbekstan, Reseı, Lıtva, Belarýs, Qytaı, Bolgarııa elderinen 800-den asa jas ánshiler, bıshiler, halyq ánderin oryndaýshy jas ónerpazdar qatysady dep kútilýde. Baıqaý qatysýshylardyń jas erekshelikterine qaraı vokal, halyqtyq oryndaýlar, horeografııa jáne balalar sán teatry atalymdary boıynsha ótedi.
«Bul balalar shyǵarmashylyǵyna arnalǵan halyqaralyq baıqaý - tek Qazaqstanda ǵana emes, Ortalyq Azııa elderinde ótkizilip kele jatqan jalǵyz shara. Ol balalardy shyǵarmashylyqpen aınalysýǵa, jańa talant ıelerin ashýǵa yqpal etetin, jańa ádistemelik jáne tájirıbelik aqparattarmen almasýǵa, oryndaýshynyń deńgeıin kóterýge, barlyq jasóspirimderdiń ónerin shyńdaýyna, tanylýyna úlken áser beretin, sondaı-aq, balalarǵa arnap qalam terbep júrgen aqyndar men kompozıtorlarǵa qoldaý kórsetetin shara. Sonymen qatar, bul baıqaý júldegerlerdiń shet eldegi beldi baıqaýlar men festıvalderge qatysýyna yqpal etip, shet elde qazaq mádenıetin nasıhattaýǵa óz úlesin qosyp kele jatyr», dedi baıqaýdyń dırektory Qarlyǵash Ábdikárimova.
