Almatyda boıjetkenge qaraqshylyq shabýyl jasaǵandar ustaldy
ALMATY. 5 qyrkúıek. QazAqparat /Ádilet Musahaev/ - Bul qylmystyq is Áýezov aýdany ІІB-niń tergeýshileriniń esepteýinshe, qaraqshylyq shabýyl bolyp tabylady. Aıtjan óziniń «áriptesterimen» jábirlenýshiniń ómiri men densaýlyǵyna qaýip tóndirip, ony býyndyra otyryp jeke múlikterin ıelengen.
«Almatynyń jas turǵyny túngi on birde jumystan úıine qaıtady. Onyń úıi men jumys aralyǵy 8 yqsham aýdandy qamtıdy. Balalar alańy janyndaǵy qıylystan óte bergende boıjetken tý syrtynan adam aıaǵynyń sybyryn estıdi. Burylyp qaraýǵa qorqyp, tezdetip alǵa qaraı júre beredi. Júgire bergende, basynan soqqy alady. Qylmyskerler onyń sómkesin qoldy etkenderine qaramastan, ony qylqyndyrmaq bolady. Alaıda ótip bara jatqan álde bireý boıjetkenge kómektesip, polıtsııa qyzmetkerlerine jedel qońyraý shalady. Úsh mınýtta qylmys ornyna úsh patrýldyq ekıpaj kelip jetti», - dep habarlady Áýezov aýdandyq ІІB-nyń polıtsııa polkovnıgi Nurlan Almasbekov.
Eki qaraqshy da iz kesý barysynda polıtseı qyzmetkerlerine ustaldy. Olar sómkeni laqtyryp úlgergen, biraq baǵaly zattardy jymqyrǵan.
«Uıaly telefon, qarajatty ámııan jáne áshekeı buıymdar qylmyskerlerdi birden ustaýǵa aıǵaq bolyp, óz kinálaryn tolyǵymen moıyndatty. Eki qylmysker de Almaty oblysy, Qaratal aýdanynyń 19 jasar turǵyndary. A. degen azamat buryndary da toptasqan qylmyspen qolǵa túsip, qylmystyq jaýapqa tartylǵan. Ol kezde oǵan 3 jyl bas bostandyǵynan aıyrý týraly úkim shyqqan. Alaıda bul oǵan sabaq bolmaǵan, ol ádetine qaıta basyp, ońaı jolmen aqsha tabý úshin adamdarǵa «shabýyl» jasaýdy qoımaǵan», - deıdi polkovnık Almasbekov.
