Almatyda bótelkemen sý satatyn 4 kásiporyn sýdy qalanyń ortalyq júıesinen alyp otyr
ALMATY. QazAqparat - Almatyda bótelkemen sý satatyn 4 kásiporyn sýdy qalanyń ortalyq sý júıesinen alyp otyr. Bul týraly Almaty qalasy Qoǵamdyq densaýlyq saqtaý departamentiniń basshysy Aızat Moldaǵasımova aıtty, dep habarlaıdy QazAqparat tilshisi.
Búgin Almaty qalasynyń Óńirlik kommýnıkatsııalar qyzmeti alańynda ótken baspasóz máslıhatynda Almaty qalasy Qoǵamdyq densaýlyq saqtaý departamentiniń basshysy Aızat Moldaǵasımova sýdy shyńyraý qudyqtan emes, ortalyq sý júıesinen alyp otyrǵan kásiporyndar týraly aıtty.
Sózin «sizder muny bilýge mindettisizder» dep bastaǵan Aızat Moldaǵasımova Almatydaǵy 13 sý satatyn kásiporyn jaǵdaıyn baıandady.
«Bizdiń baqylaýymyzda 13 bótelkege sý quıyp satatyn kásiporyn bar. Onyń 9-y Aqua Vista, Bizz, Vita, Sevens water, Calipso, Aqua nova, Rosınka, Han Tengrı, Serebrennaıa syndy kásiporyndar sýdy burǵylanǵan qudyqtan alyp otyr, al «Nova water», «Auwa Domino», «Tıbetskaıa voda», «Samal» syndy kásiporyndar qalanyń ortalyq sý júıesinen sý quıyp, satyp otyr», - dedi ol.
Departament basshysy zań boıynsha olarǵa eshqandaı jaza qoldanylmaıtynyn aıtty.
«Ortalyq sý júıesinen sý satýǵa bolmaıdy degen zań joq. Sondyqtan, olarǵa eshqandaı jaza qoldanylmaıdy. Qandaı sý ishesiz, ol sizdiń tańdaýyńyzǵa baılanysty», - dep tolyqtyrdy sózin departament basshysy.
