Almatyda botanıkalyq baqtyń qorshaýy súrilmeıtin boldy
ALMATY. QazAqparat - Almaty bıligi bir aıdan beri jappaı qorshaýlardy súrýge kirisken edi. Qala bıligi bıik qorshaýlar qalanyń estetıkalyq beınesin buzady dep sanaıdy. Al, kúrdeli ǵylymı jumystar júretin ǵylymı uıymdardyń qorshaýynyń taǵdyry qandaı bolady? Bul týraly búgin Ǵylym ordasynda ótken jıynda belgili boldy, dep habarlaıdy QazAqparat tilshisi.
Ǵylymı ınstıtýt basshylary ákimdik qorshaýlardy mindetti túrde súrýge májbúrlep otyrǵan joq deıdi.
Almatynyń maqtanyshy - 85 jyldyq tarıhy bar botanıkalyq baqtyń qorshaýy saqtalady.
«Erekshe kúzette bolýy tıis tabıǵat aımaqtary týraly zańǵa sáıkes qorshaýlardy saqtap qalýǵa bolady. Bizdiń uıym sol sanattaǵy uıymdarǵa jatady», - dedi QR BǴM ǴK «Botanıka men fıtoıntrodýktsııa ınstıtýtynyń» bas dırektory Gúlnar Sıtpaeva.
Ǵalymdar barlyq uıymdarda birdeı qorshaý saqtalmaıtynyn aıtty.
«QR UǴA Organıkalyq katalız jáne elektrohımııa ınstıtýtynyń qorshaýy súriledi. Alaıda biz tek jasyl jelek ósip turǵan jaqty alyp tastadyq. Kógaldandyrý baǵdarlamasynyń avtory Isa Baıtýlın 10 jyl buryn jasyl jelek otyrǵyzǵan edi. Qazir aǵashtar bıiktep ketti. Sol jaǵynda qorshaý joq. Al hımııalyq reaktıvter turǵan qoımany qorshap qoıdyq. Sebebi bul adamdar úshin qaýipti»,- dedi QR UǴA prezıdenti, ınstıtýt dırektory Murat Jurynov.
Qalalyq sáýlet jáne qala qurylysy basqarmasy málim etkendeı, tek qoǵamdyq paıdalanýǵa kedergi keltirip otyrǵan qorshaýlar ǵana alynyp tastalady. Máselen, saıabaq, skver, úı aınalasyndaǵy, bıznes ortalyqtardaǵy, saýda oryndaryndaǵy qorshaýlar buzylady. Negizgi maqsat ortalyq jáne magıstraldy kóshelerdegi qala kórkin buzyp turǵan qorshaýlardy alyp tastaý bolyp otyr.
Mektep, balabaqsha, basqa da kúzetýdi talap etetin áleýmettik nysandardyń, quqyq qorǵaý organdary, ІІB, prokýratýra, áskerı bólimder ornalasqan ǵımarattardyń qorshaýy alynbaıdy.
