Almatyda Bostandyq aýdanynyń turǵyndary gazsyz qaldy
ALMATY. QazAqparat – Almatynyń Bostandyq aýdanynda gaz taratý qurylǵysynda apatqa qarsy qorǵanystyń iske qosylýynan turǵyn úıler apatty jaǵdaıda kógildir otynnan ajyratyldy, dep habarlaıdy QazAqparat tilshisi.
«QazTransGaz Aımaq» AQ-nyń avarııalyq-dıspetcherlik qyzmetine aqparat 30 naýryz saǵat 19:45-te túsken. Oqıǵa saldarynan tórt shaǵynaýdannyń (Orbıta-1,2,3,4) turǵyndary ýaqytsha gazsyz qaldy.
«QazTransGaz Aımaq» mamandary apat ornyna baryp, jedel sharalar qabyldady. Onyń ishinde gaz taratý pýnkterinde kirý jáne shyǵý jolyndaǵy bekitkish armatýralar jabylyp, qorǵasyndy plombamen plombalandy. Qaýipsizdik tehnıkasynyń talaptaryna sáıkes, túngi ýaqytta jóndeý-qalpyna keltirý jumystary júrgizilmeıdi. Osyǵan baılanysty jumystar erteń tańǵy saǵat 09:00-de bastalady.
