Almatyda Bosch kompanııasynyń jańa keńsesi ashyldy
ALMATY. 23 tamyz. QazAqparat /Názıra Eleýhan/ - Búgin Almatyda Bosch kompanııalar tobynyń jańa keńsesiniń ashylý rásimi bolyp ótti.
Jańa keńseniń aýmaǵy 2000 sharshy metr. Onda 34 qyzmetker jumys isteıdi. Ǵımaratta termotehnıka jáne elektr quraldarymen jumys isteýge úıretetin oqý ortalyqtary bar. Kompanııa basshylarynyń aıtýynsha, bul jańa ofıstiń basty erekshelikteriniń biri.
Atalmysh sharanyń ashylý saltanatyna Bosch tobynyń Reseı, Ýkraına, Belorýssııa men Qazaqstandaǵy Ókiletti ókili Rene Shlegel, Qazaqstandaǵy «Robert Bosh» JShS bas dırektory Volfram Klınger, Ortalyq Azııadaǵy German ekonomıkasy ókildiginiń basshysy Iorg Hetch jáne kompanııanyń seriktesteri qatysty.
"Jańa keńseniń ashylýyna yqpal etken negizgi sebepterdiń biri - kompanııa qyzmeti men ónimine qazaqstandyq tutynýshylar tarapynan suranystyń artýy bolyp otyr",-dep atap ótti keńseniń ashylý saltanatynda Bosch tobynyń Reseı, Ýkraına, Belorýssııa men Qazaqstandaǵy Ókiletti ókili Rene Shlegel.
Onyń aıtýynsha, Almatyda jańa zamanaýı keńseniń ashylýy kompanııanyń Qazaqstandaǵy qyzmetin damytý baǵytynda jasalǵan mańyzdy qadamdardyń biri. "Bizdiń kompanııamyz Qazaqstan naryǵynda qarqyndy damyp keledi. Ótken, 2010 jyldyń ózinde Bosch kompanııalar tobynyń TMD elderi aýmaǵyndaǵy satylymdarynyń jalpy kólemi aldyńǵy jylmen salystyrǵanda 37 paıyzǵa artyp, 770 mıllıon eýroǵa jetti. Qazaqstanda Bosch aımaqtyq aınalymǵa da ózindik úles qosty, onyń kólemi tuńǵysh ret 10 mln. eýroǵa jetip otyr», - dedi ol
Qazaqstandaǵy «Robert Bosh» JShS bas dırektory Volfram Klıngerdiń aıtýynsha, jańa keńse Bosch kompanııasynyń 125 jyldyǵy men onyń negizin qalaýshy Robert Boshtyń 150 jyldyq mereıtoıyna oraı arnaıy ashylǵan.
Volfram Klıngerdiń aıtýynsha, kompanııa elektr qýatyn únemdeý máselesine úlken mán beredi. "Sondyqtan da elektr qýatyn únemdeýge, atmosferaǵa tastalatyn zııandy qaldyq mólsherin qysqartýǵa jáne Almaty qalasynyń ekologııasyn jaqsartýǵa baǵyttalǵan jobalardy júzege asyryp kelemiz. 2009 jyly «Robert Bosch» kompanııasy Almaty qalasynyń Qurylys basqarmasymen birge «Uljan» yqsham aýdanyndaǵy balabaqshany ystyq sýmen qamtamasyz etý jobasyn júzege asyrdy. Joba boıynsha bala-baqshaǵa kúnmen jumys isteıtin kollektorlar ornatyldy. Bir jyldan keıin onyń ekonomıkalyq tıimdiligi dáleldendi. Tórt-bes jyldan keıin ózin-ózi tolyq aqtaıtyn gelıojúıe 15-20 jyl qyzmet etetin bolady",-dedi ol.
