Almatyda bos jumys oryndary jármeńkesi ótip jatyr
ALMATY. 15 sáýir. QazAqparat /Názıra Eleýhan/ - Búgin Almatyda qalalyq bos jumys oryndary jármeńkesi ótip jatyr. Onyń maqsaty - jumys berýshiler men izdeýshilerdiń arasynda tikeleı baılanys ornatý arqyly jumys izdeýshi azamattardyń jumysqa ornalasýlaryna járdemdesý bolyp tabylady.
Atalmysh sharanyń uıymdastyrýshylary - Almaty qalalyq jumyspen qamtý jáne áleýmettik baǵdarlamalar basqarmasy, Almaly aýdanynyń ákimdigi, Almaly aýdandyq jumyspen qamtý jáne áleýmettik baǵdarlamalar bólimi.
Jármeńkege kelýshilerdiń árbiri qalada bar bos jumys oryndarymen, kásibı daıarlaý kýrstarynda oqytylatyn mamandyqtardyń tizimimen, sondaı-aq jumyssyzdyqtan áleýmettik qorǵaý sharalarymen tanysa alady.
Jármeńkege «Temirbeton» JShS, «Rahat» AQ, «Eır Astana» AQ, «Qazaqstan» qonaqúıi, «Maslodel» kompanııasy, «Koka kola Almaty Botlers» kásiporny, «Mon Ami» saýda úıi syndy 70-ten astam jumys berýshi kompanııalar qatysýda. Olar 1000-nan asa bos jumys oryndaryn usynýda.
Sharaǵa sonymen qatar, qalanyń oqý mekemeleri, ÚEU-dar, qalalyq eńbek bırjasy, aýdandyq jumyspen qamtý jáne áleýmettik baǵdarlamalar bsqarmalarynyń bólimderi qatysýda. "Jármeńkeniń ereksheligin atap ótkim keledi, bul shara bıylǵy jylǵy alǵashqy jármeńke. Sondyqtan biz erekshe ótkizýge tyrystyq. Jumys izdeýshilerge sáttilik, al jumys berýshi kompanııalarǵa senimdi qyzmetker tabýlaryna tilektespin",-dedi Almaly aýdanynyń ákimi Marat Pirinbekov.
Búgin jármeńkege qatysýshylar men qonaqtarǵa arnap Qurmanǵazy atyndaǵy Qazaq ulttyq konservatorııanyń orkestri óner kórsetýde.
Almaty qalasynyń jumyspen qamtý jáne áleýmettik baǵdarlamalar basqarmasynyń statıstıkalyq málimetinshe, aǵymdaǵy jyly birinshi toqsanda jumyssyzdyq deńgeıi ekonomıkalyq belsendi turǵyndar sanynan 5,7 paıyzǵa baǵalanǵan. Eńbek naryǵynda tirkelgen jumyssyz júrgenderdiń sany - 3 600 adamdy quraıdy.
