Almatyda bos turǵan ǵımarattar áleýmettik nysandar retinde berilip jatyr
ALMATY. QazAqparat – Almatyda bos turǵan ǵımarattar mektep, balabaqsha, emhana retinde qoldanysqa berilip jatyr. Bul týraly onlaın brıfıng barysynda Almaty Memlekettik aktıvter basqarmasynyń basshysy Rústem Álıev aıtty, dep habarlaıdy QazAqparat tilshisi.
Qala ákimi Baqytjan Saǵyntaevtyń tapsyrmasy boıynsha, jumysy toqtap turǵan ǵımarattar áleýmettik nysandarǵa - mektep, balabaqsha emhanalarǵa beriledi.
Rústem Álıevtiń aıtýynsha, bıyl qala respýblıkalyq menshikten bos turǵan eki nysandy qabyldady.
«Túrksib aýdanyndaǵy M.Tynyshbaev kóshesindegi 4/6-úı qaıta jańartyldy. Aýdany 491,3 sharshy metr keshen psıhonevrologııalyq patologııasy bar múgedek balalarǵa arnalǵan 60 orynǵa eseptelgen kúndiz qabyldaıtyn ortalyq bolyp ashylady. Sonymen qatar, Bostandyq aýdanyndaǵy Almaly baq kóshesindegi 4A-úıdegi aýdany 196,9 sharshy metr ǵımaratta «Baqytty otbasy» keshendi baǵdarlamasy aıasynda «Іsker Ana» ortalyǵyn ashý josparda»,– dedi ol.
Sonymen qatar, ol jeke zańdy tulǵalardan syıǵa tartý sharty boıynsha úsh nysan qabyldanǵanyn jetkizdi.
«Bostandyq aýdanynda Egizbaev kóshesi, 7 A, aýdany 3115,7 sharshy metr bolatyn balabaqsha qaıta jańartylyp 150 orynǵa eseptelgen №191 memlekettik balabaqsha bolyp ashyldy. Balabaqsha tuzdy shahtamen jáne sensorlyq bólmemen jabdyqtalǵan. Odan bólek, Almaly aýdanyndaǵy S.Máýlenov kóshesi, 46 mekenjaıyndaǵy «Elit Tower» turǵyn úı kesheniniń birinshi qabatyndaǵy aýdany 217,1 sharshy metr turǵyn úı emes ǵımaratty jergilikti turǵyndardyń qajettilikterin eskere otyryp, oqyrmandarǵa qyzmet kórsetý úshin ashyq aımaqtarmen koýorkıng ortalyq kitaphanasyn ashý kózdeledi. Al «Atakent» aýmaǵyndaǵy abattandyrý obektileri aýdan ákimdiginiń kommýnaldyq menshigine ótkennen keıin, ýaqytyly qyzmet kórsetýdi jáne kútim kórsetýdi uıymdastyrdy»,– dedi R. Álıev.
Aýdany 59,5 sharshy metr bolatyn Jetisý aýdanyndaǵy bos turǵan ǵımaratty kommýnaldyq menshik obektilerin qaıta bólý arqyly dombyra mektebi ashyldy. Onda balalar halyq aspaptarynda oınaýdy tegin úırenedi.
