Almatyda Boraldaı ózeniniń arnasyn abattandyrý jumysy júrip jatyr
Almaty qalasy ákiminiń orynbasary Álisher Ábdiqadyrovpen kezdesý kezinde merdiger uıymnyń ókili atqarylǵan jumystardy baıandady. Onyń sózinshe, búginde jer jumystary aıaqtalǵan, 70%-ǵa nyǵaıtý jumystary iske asty, eki toǵan tazartyldy, fýtbol men basketbol alańdary qorshaldy.
Sondaı-aq jergilikti turǵyndar qaldyrǵan turmystyq qoqystyń shyǵarylǵanyn atap ótti. Jobada asfalt jáne jabyndy tóseý, ýrnalardy, oryndyqtardy, modýldik sanıtarlyq-gıgıenalyq toraptardy, syrtqy jaryqtandyrý jáne sýarý júıesiniń tirekterin, sý qoımasynyń aınalasyna aǵash pırsterdi ornatý qarastyrylǵan.
Belsendi aımaqta balalar men sport alańdaryn salý, tennıs ústelderin ornatý josparlanyp otyr. Joba boıynsha kógaldandyrýǵa erekshe nazar aýdarylmaq. Mıkroklımatty saqtaý úshin mamandar 1,5 myńnan astam aǵash (terek, úıeńki, jemis) jáne 5 myńǵa jýyq gúldi ósimdikterdi otyrǵyzýdy josparlap otyr. Landshaft dızaınerleri gúlzarlardy otyrǵyzýǵa daıyndyq júrgizýde, bólek aımaqta alma aǵashtaryn otyrǵyzatyn qazaq baý-baǵy aımaǵy bolady. Bolashaqta munda naýryz aıynda halyqtyq merekeler ótkizýge, Japonııadaǵy sakýra gúlderine uqsas qyzǵaldaqtardyń gúldenýin kórýge bolady.
Sonymen qatar shaǵyn sý qoımasynyń aınalasynda lotos pen sý lalagúlderin otyrǵyzatyn japon baqshasynyń qurylysy qarastyrylǵan. Kógaldandyrý jumystary sýarý júıesin ornatqan soń bastalady. Sý Boraldaı ózeninen alynady, qosymsha skvajına bolady. Boraldaı ózeniniń arnasyn nyǵaıtý jobasy sý tasqyny máselesin sheshýge de yqpal etpek. Sebebi oǵan qalanyń joǵarǵy bóliginen úsh kanal men eki kollektor tartylǵan.
«Bul – Alataý aýdanyndaǵy abattandyrylǵan alǵashqy jaǵalaý. Ol jergilikti turǵyndar úshin jańa serýendeý ortalyǵyna aınalady, bul shamamen 30 myń adam – Saıaly, Kókqaınar, Ójet shaǵyn aýdandarynyń turǵyndary. Ózderińiz bilesizder, qazir Almatynyń barlyq aýdany teń áleýmettik, kóliktik jáne rekreatsııalyq ınfraqurylymmen jáne ómirdiń joǵary standarttarymen qamtamasyz etiletin polıortalyqtyq qaǵıdat boıynsha damyp keledi. Bul joba polıortalyqtyń jarqyn úlgisi bolady», - dedi Álisher Ábdiqadyrov.
Almaty qalasy ákiminiń orynbasary merdiger uıymǵa jumys qarqynyn arttyrýdy, belgilengen merzimde jaǵalaýdy abattandyrý jumystaryn sapaly aıaqtaýdy tapsyrdy.