Almatyda bopsalaýshy top ustaldy
ALMATY. 30 maýsym. QazAqparat /Názıra Eleýhan/ - Almatyda bopsalaýshy top ustaldy. Tórt bopsalaýshylardyń jasy 18-20 jas aralyǵynda. Olar jeke menshik kompanııalarda jumys isteıtin, Almaty qalasynyń "Aınabulaq" yqsham aýdanynda turatyn bolyp shyqty, dep habarlaıdy Almaty qalasynyń ІІD-niń baspasóz qyzmeti.
Jas jigitter óz qurbandaryn kórshileri arasynan jáne tek jasóspirimderdi izdegen.
"Polıtsııaǵa jasóspirim balanyń anasy shaǵymdandy. Ol 18 jastaǵy ulyn belgisiz bireýler 500 myń teńge talap etip, bopsalap jatqandyǵyn jetkizdi. Bermeıtin bolǵan jaǵdaıda "taıaqtyń astyna alamyz" dep qorqytqan. Biz bul habar túsisimen jedel sharany uıymdastyryp, arnaıy tergeý tobyn qurdyq. Tapa-tal túste bopsalaýshylar talap etken qarjyny alý barysynda quryqtaldy. Operatsııa "Arlan" arnaıy bólimshesimen birigip iske atqaryldy",-dedi Almaty qalasynyń ІІD-niń uıymdasqan qylmyspen kúres basqaramasy bastyǵynyń orynbasary, polkovnık Erlan Qasym.
Onyń aıtýynsha, bul qylmystyq toptan taǵy da birneshe jas balalar zardap shekken.
"Ol tekserý barysynda belgili boldy. Qazir tekserý basqarmasynda eki aryz-shaǵym jatyr. Bul toptan qurban bolǵan adamdardyń tizimi áli de ósýi ábden múmkin. Qazir ustalǵandardyń basqa osy syndy qylmystarǵa qatysy bar-joǵy anyqtalýda. Olar buǵan deıin isti bolmaǵan. Osy is boıynsha olar óz kinálaryn moıyndady. Qorqytyp, kúshtep alý faktisi boıynsha qazir qylmystyq is qozǵaldy",-dedi E. Qasym.
