Almatyda bolǵan órtten japa shekkender joq
ALMATY. QazAqparat - Almatyda órt oshaǵynan 6 gaz ballony shyǵaryldy, dep habarlady QazAqparat tilshisi.
Eske sala keteıik, buǵan deıin búgin tańerteń Almatyda kóp qabatty ǵımarat shatyrynda órt shyqqany habarlanǵan bolatyn.
«16 qańtar saǵat 08:55-te Almaty qalasy boıynsha TJD-niń 101 pýltine Medeý aýdany, Jibek Joly 64 mekenjaıy boıynsha ornalasqan 8 qabatty turǵyn úıdiń shatyrynan órt shyqqany týraly aqparat tústi. Órt sóndirý qyzmeti atalǵan mekenjaıǵa 8 mınýt ishinde, ıaǵnı saǵat 09:03-te bardy. Qosymsha aqparat aldaǵy ýaqytta habarlanatyn bolady», dep habarlaǵan bolatyn Almaty qalasy TJD resmı ókili Sandýǵash Baımuhambetova.
Onyń málimetine súıensek, ǵımarat shatyry qatty tútindegen. Órt sóndirýshiler ókpeni tútinnen qorǵaý apparatyn paıdalanyp, ǵımaratta adam bar-joǵyn tekserip shyqty. Sonymen qatar, qosymsha órtke sebep bolatyn qurylǵylardy da izdedi. Qoldanylǵan shara nátıjesinde 6 gaz ballony shyǵaryldy.
«Órt saǵat 09:10-da aýyzdyqtalyp, 09:14-te sóndirildi. Órt aýmaǵy 5 sharshy metr. Onda aýa aınalymy arnasyna qaldyrylǵan taǵamdardyń kesirinen «REDDRACON» meıramhanasynyń aýa ótkizgish elektrqozǵaltqyshy órtengen», dedi TJD-niń resmı ókili.
Órtten japa shekkender joq.
