Almatyda bolǵan órt 12 otbasyn baspanasyz qaldyrdy
ASTANA. Tamyzdyń 28-i. QazAqparat - Almatyda bolǵan órt 12 otbasyn baspanasyz qaldyrdy. Bul aqparatty elimizdiń Tótenshe jaǵdaılar mınıstrliginiń baspasóz qyzmeti taratyp otyr.
Qalanyń Túrksib aýdanyna qarasty «Juldyz-2» yqshamaýdanyndaǵy turǵyn úıdiń órtenip jatqandyǵy týraly habar ońtústik astananyń órt sóndirý qyzmetine túsken. Saǵat 15:25-te quramynda 3 bólimshe bar 4-shi órt bóliminiń birinshi bólimshesi jetken kezde ǵımarattyń 1-shi qabattan 10-qabatqa deıingi aralyqtaǵy syrtqy alıýkobondty qaptamasy qarqyndy órtenip jatqan. Osyǵan oraı tilsiz jaýdy aýyzdyqtaý maqsatynda qosymsha 9 bólimshe jiberilgen.
«Aldyn ala júrgizilgen barlaý barysynda ǵımarattyń mansardynda ornalasqan 12 páterdiń jáne shatyrdyń órtengeni anyqtaldy. Qaterge toly órtti aýyzdyqtaý barysynda 1 adam qutqarylyp, 40 turǵyn qaýipsiz jerge kóshirildi», delingen baspasóz habarlamasynda.
Qyzyl jalyndy sóndirýge 14 negizgi jáne 5 arnaıy órt sóndirý tehnıkasy, garnızonnyń jeke quramyndaǵy 110 maman jumyldyrylǵan.
Tún ortasynda sóndirilgen órt 880 sharshy metrdi qamtyp, ǵımarttyń búkil mansardy jaramsyz bolyp qaldy. Órttiń shyǵý sebepteri men keltirgen materıaldyq zııan naqtylanýda. Tótenshe jaǵdaı oryn alǵan jerde Almaty qalalyq tótenshe jaǵdaılar departamentiniń tergeý bólimi jumys isteýde.
