Almatyda «Bolero» atty retro derekti fılmniń tanystyrylymy bolyp ótti

Derekti fılm Keńes dáýirinde sol zamannyń «kınoformatyna» saı bolmaǵandyqtan, umyt bolyp qalǵan bolatyn.

Atalmysh derekti fılm Qaraǵandy telearnasynyń kınostýdııasynda 1968 jyly shyqqan. Stsenarıı avtory Amantaı Sataev (1933-2003), rejısseri Vladımır Shamshýrın (1940-1996). Fılmniń uzaqtyǵy 16 mınýt. Kartınanyń oqıǵalary Qaraǵandy oblysyndaǵy dala aýdandarynyń birinde, basty keıipker - Qanaǵat Ahmetjanov degen shopannyń otbasynda ótedi. Fılmde qarapaıym qazaq otbasynyń kúndelikti ómiri baıandalady. Týyndynyń bir ereksheligi - fılmde ataqty frantsýz kompozıtory Morıs Ravelıanyń «Bolero» mýzykasynyń súıemeldeýimen qazaq jeriniń tabıǵat sulýlyǵy, qazaq halqynyń salt-dástúri kórsetilgen.

«Kınojumys óz baǵasyn alǵannan keıin muraǵatqa jiberilip umyt bolyp ketken. Derekti fılm birde-bir respýblıkalyq telearnalarda kórsetilgen joq, fılm dúnıege kelgennen keıin tek Qaraǵandy telearnasynda ǵana kórsetildi. Qyzyqty da, erekshe fılm qanshama jyldar ótse de óziniń ózektiligin joǵaltpaǵandyqtan, bizdiń muraǵat fılmdi jańǵyrtýdy jón kórip, onyń kóshirmesin aldyryp, búgin mine tanystyrylymyn jasap jatyrmyz. Aldaǵy ýaqytta fılmdi qaıta óńdeýden ótkizýdi josparlap otyrmyz, daıyn bolǵannan keıin respýblıkalyq televıdıdardan kórsetiletin bolady»,- dedi Ortalyq memlekettik muraǵattatyń dırektory Alla Seıitova.

«Týyndy jaqsy oılap tabylyp, estetıkalyq talǵammen, kásibı sheberlikpen túsirilgen. Bul fılm etnografııaǵa qyzyǵatyndarǵa, el tarıhyn bilgisi keletinderge, aýyldy, dalany, jastyq shaqty eske alǵysy keletinder úshin arnalǵan», - dedi rejısser Serik Jarmuhamedov. Onyń aıtýynsha, Amantaı Sataev óte qadirli azamattardyń biri bolǵan. «Ekeýmiz birneshe kartınany birge jasadyq. Amantaı árqashan tarıhymyzdan syr shertetin dúnıelerdi, elimizdiń uly tulǵalarynyń ómirin baıandaıtyn jumystardy jasaǵandy jaqsy kórdi. Máselen ol, Sábıt Muqanov, Serke Qojamqulov, Qanysh Sátbaev, Ǵabıt Músirepov, Sultanmahmut Toraıǵyrov jáne taǵy da basqa kóptegen uly tulǵalarymyz jaıynda derekti fılmniń stsenarııin jazdy. Onyń kásibı jasaýynan bir bólek fılmge taqyryp berýde óte tapqyrlyq kórsetetin. Maǵan asharlyq jaıynda túsirilgen fılmge qoıǵan ataýy unady, ol fılm «Qara taban qandy jol» dep atalady», - dedi ol.