Almatyda Bolathan Taıjan týraly derekti fılmniń tusaýkeseri ótti
ALMATY. 8 naýryz. QazAqparat /Erlik Erjanuly/ - Búgin kórnekti qoǵam qaıratkeri, dıplomat, pýblıtsıst Bolathan Quljanuly Taıjannyń dúnıege kelgenine 70 jyl toldy.
Osyǵan oraı Almatyda jýrnalıst Qasym Amanjolulynyń avtorlyǵy men rejısserligimen "Jaınaǵan týyń jyǵylmaı..." dep atalatyn derekti fılmniń tusaýkeseri jasalyp, as berildi.
"Qazaq atty kóne el, kóne halyq tarıhymyz sııasy áli keppegen taraýynda Bolathan Quljanuly Taıjan degen aty-jónniń óshpeske jazylyp turǵany aqıqat. Bolathannyń ómiri tolqyn-tolqyn bolyp kelip jatatyn urpaǵyna ónege. Ol arab áleminiń esigin Qazaqstanǵa aıqara ashqan tarıhı tulǵa. Eldestirý nıetimen álemniń ondaǵan memleketinde bolǵanyn, sonyń bárinde de Qazaqstanyn, qazaǵyn nasıhattaǵan uly eńbegin tizbelemegenniń ózinde", - deıdi jazýshy, satırık Ǵabbas Qabyshuly.
Onyń aıtýynsha, fılosof, dıplomat, tarıhshy, jýrnalshy, til janashyry Bolathan haqynda estelik aıtyla bastaǵanyna 5 jyl boldy. Esen-saý bolsa jasy 70-ke búgin ǵana tolatyn, biraq 65 jyl ǵana ómir súrgen Bolathannyń eline, halqyna sińirgen qyrýar eńbegin zertteý, taldaý áli alda. Ol óristeı beredi. Bolathan Quljanuly shet eldermen aradaǵy elshilikterimizde is-qaǵazdaryn memlekettik tilde júrgizý máselesin táýelsizdigimizdiń týymen birge kóterdi. Ony ózi iske asyrdy da, barlyq elshilikterde solaı bolý qajettigin memlekettik shara deńgeıine jetkize aıtty.
