Almatyda «Bolashaqqa ıntellektýaldyq serpilis» atty halyqaralyq ǵylymı-tájirıbelik konferentsııa ótip jatyr

Konferentsııanyń maqsaty - QR Prezıdenti Nursultan Nazarbaevtyń 2009 jyly qazannyń 13-de osy oqý ornynyń qabyrǵasynda oqyǵan «Qazaqstan daǵdarystan keıingi dúnıede: bolashaqqa ıntellektýaldyq sekiris» atty dárisindegi qozǵalǵan Ult kóshbasshysy bastamasy aıasynda Qazaqstandaǵy zııaly ultty qalyptastyrýdyń túpkilikti máselelerin talqylaý. «Nur Otan» HDP janyndaǵy Quqyqtyq keńes pen Ál-Farabı atyndaǵy Qazaq ulttyq ýnıversıteti birlesip ótkizip otyrǵan sharaǵa QR Parlamenti Májilisiniń depýtattary, ǵalymdar, sarapshylar, úkimettik emes uıymdardyń jetekshileri, halyqaralyq uıymdardyń ókilderi, BAQ ókilderi qatysýda.

Uıymdastyrýshylardyń aıtýynsha, konferentsııa barysynda «bolashaqqa sekiris jasaýǵa» bolatyn salalardyń múmkindigi jaıly sarapshy mamandardyń baıandamalary tyńdalady. Sarapshylar qatarynda zań ǵylymdarynyń doktory, professor, ál-Farabı atyndaǵy QazUÝ-dyń zań fakýltetiniń dekany Dáýlet Baıdeldınov, psıhologııa ǵylymdarynyń doktory, professor, Reseı memlekettik medıtsına ýnıversıtetiniń L.S. Vygotskıı atyndaǵy Psıhologııa ınstıtýty, psıhologııa tarıhy men teorııasy kafedrasynyń meńgerýshisi Vladımır Kýdrıavtsev, fılosofııa ǵylymdarynyń kandıdaty, Reseı memlekettik gýmanıtarlyq ýnıversıtetiniń Sotsıologııa tarıhy men teorııa kafedrasynyń dotsenti Gúlshat Orazalıeva, QR Parlamenti Májilisiniń Ekonomıkalyq reforma jáne óńirlik damý komıtetiniń hatshysy, «Nur Otan» HDP janyndaǵy Quqyqtyq keńestiń múshesi Murat Ábenov, «Bolashaq» stıpendıattary qaýymdastyǵy keńesiniń múshesi Arman Ydyrysov jáne taǵy basqa mamandar bar.