Almatyda «Bóbek» qaıyrymdylyq qorynyń 20 jyldyǵy aıasynda Sara Alpysqyzynyń grant ıegerlerimen arnaıy kezdesý bolyp ótti
ALMATY. 27 naýryz. QazAqparat - Bıyl Sara Alpysqyzy Nazarbaevanyń tikeleı bastamasymen qurylǵan «Bóbek» qaıyrymdylyq qoryna 20 jyl tolyp otyr.
Osyǵan oraı, respýblıkamyzdyń barlyq aımaǵynda merekelik is-sharalar ótýde. Atalysh shara aıasynda búgin Almatyda «Bóbek» Ulttyq ǵylymı-praktıkalyq bilim berý jáne saýyqtyrý ortalyǵynyń Adamnyń úılesimdi damýy ınstıtýty Sara Alpysqyzynyń grant ıegerlerimen «Dostar sheńberi» atty arnaıy kezdesý ótkizdi.
Esterińizge sala ketsek, bul bilim granttary jetim, turmysy tómen kópbalaly otbasynan shyqqan, asyraýshysynan aıyrylǵan, ata-anasynyń biriniń qamqorynda qalǵan balalarǵa áleýmettik kómek kórsetý maqsatynda taǵaıyndalǵan bolatyn.
Kezdesýdiń maqsaty - «Bóbek» qorynyń 20 jyldyq mereıtoıyn atap ótý jáne Sara Alpysqyzynyń arnaıy grant ıegerleriniń Joǵarǵy oqý oryndarynda bilim alý úderisiniń alǵashqy qorytyndylaryn shyǵarý bolyp tabylady. Búginde 72 jasóspirim Sara Alpysqyzynyń arnaıy grant ıegerleri.
Shara Adamnyń úılesimdi damýy ınstıtýty ujymy qurastyrǵan oqýlyqtar, ádistemelik kómekshi quraldar, respýblıkalyq jýrnaldar qoıylǵan kórmemen ashyldy. Atap ótý kerek, Adamnyń úılesimdi damýy ınstıtýty «Ózin-ózi taný» páni boıynsha tikeleı rýhanı-adamgershilik ıdeıasyn júzege asyryp otyrǵan oryn. Kezdesý barysynda Grant ıeleriniń búgingi stýdenttik ómiri jaıly fotoreportajdar kórsetilip, olarǵa syılyqtar tabys etildi. Óz kezeginde grant ıegerleri alǵystaryn bildirip, «Bóbek» qaıyrymdylyq qorynyń 20 jyldyǵymen quttyqtady. Shara barysynda sondaı-aq, oqý-ádistemelik keshenderiniń avtorlary sheberlik synyptar ótkizdi.
