Almatyda «BMV» qaǵyp ketken qyzdardyń biriniń jaǵdaıy aýyr
ALMATY. QazAqparat - Almatyda «BMV» kóligi qaǵyp ketken qyzdardyń jaǵdaıy týraly dárigerler túsinikteme berdi, dep habarlaıdy Qazaqparat tilshisi.
Aýrýhananyń jaraqat bóliminiń meńgerýshisi Ramazan Áskerovtiń aıtýynsha, qyzdar qazir №7 qalalyq aýrýhanada emdelip jatyr.
«Qyzdardyń biri 19 jastaǵy Kámshat Qurymbaevanyń san súıegi synyp, bulshyq eti jyrtylyp, basy jarylyp, mıy shaıqalǵan. Boıjetkenge eki ret ota jasaldy. San súıegi men bulshyq eti qalpyna keltirildi. Keıin arnaıy fıksatorlarmen bekitildi. Patsıent jaraqat bólimine aýystyryldy. Sondaı-aq, onyń bas súıegine trepanatsııa jasaldy», - dedi Ramazan Áskerov.
Jaraqat alǵan 20 jastaǵy ekinshi qyz Klara Islamovanyń jaǵdaıyn dárigerler aýyr dep baǵalap otyr.
«Boıjetkenniń basy jarylǵan, bet súıeginiń qańqasy synǵan. Sol jaq san súıegi synǵan», - dedi.
Boıjetkenniń san súıegine ota kelesi aptada jasalady.
Aıta ketý kerek, jol apaty 26 qyrkúıekte tańǵy 08:40 shamasynda Raıymbek kóshesinde bolǵan. Júrgizýshi kóligimen joldan ótip bara jatqan eki qyzdy qaǵyp, oqıǵa orynan qashyp ketken.
Jol apatynan soń qaıǵyly oqıǵany kózimen kórgen kýágerler suraldy, jergilikti baqylaý kameralary tekserildi. Sol kúni jaqyn jerde soǵylǵan belgileri bar «BMW 525І» tabylǵan. Sonyń arqasynda kólik ıesi anyqtaldy.
Ol 25 jastaǵy Almaty oblysynyń turǵyny bolyp shyqty. Ermek Násil QR QK 345-babynyń 2-bólimi jáne QR QK 341-babynyń 2-bólimi boıynsha jaýapqa tartylmaq.
