Almatyda blok-beketter «Sergek» kameralarymen baqylanady
ALMATY. QazAqparat - Almaty polıtsııasy baqylaý-ótkizý pýnktterindegi jaǵdaıdy beınekameralardyń kómegimen baqylap otyr, dep habarlaıdy QazAqparat tilshisi.
Almatyda karantın engizilip, el ishinde tótenshe jaǵdaı jarııalanǵaly beri Polıtsııa departamentiniń qyzmeti men bólimsheleriniń quramy kúsheıtilgen tártippen jumys isteýge kóshti.
«Qorǵanys mınıstrliginiń myńǵa jýyq áskerı qyzmetshileri karantın aımaǵynda qurylǵan 27 baqylaý-ótkizý pýnktterinde qyzmet etedi. Sonymen qatar ınfektsııa oshaqtary men medıtsınalyq mekemelerin qorshaýǵa alý týraly sharalar qabyldandy. 150-ge jýyq polıtsııa qyzmetkeri men Ulttyq ulannyń jaýyngerleri táýlik boıy qyzmet etedi. Ár postqa departamenttiń ortalyq shtabyna shyǵatyn «Sergek» kameralary ornatyldy. Ǵalamtordaǵy trafık baqylanady, kólikterdiń kelýi jáne ketýi, posttardyń janynda zańsyz áreketter anyqtalady. Olar jáne dereý toqtatylady», – dedi Almaty qalalyq polıtsııa departamentiniń basshysy, polıtsııa polkovnıgi Qanat Taımerdenov.
Sondaı-aq, qalanyń polıtsııa basshysy karantın kezeńinde halyqpen keri baılanys qalaı qurylǵanyn aıtty.
«Buryn habarlanǵandaı, Almatyda karantın engizilgen ýaqyttan bastap polıtsııa Departamentinde Call-ortalyq quryldy. Maqsaty – ótkizý rejımine qatysty jáne zańdylyqty saqtaý týraly eń ózekti suraqtarǵa jaýap berý. Ortasha alǵanda, kóp arnaly nómirge kúnine 4 myń telefon qońyraýy túsedi. Sonymen qatar, PD Jedel basqarý ortalyǵyna jumys kúnderi 2 myńǵa deıin telefon qońyraýy túsedi. «102» nómirine telefon shalǵandardyń úshten biri anyqtamalyq sıpattaǵy aqparatty alady. Servıs operatorlary eki aýysymdyq rejımde jumys isteıdi. Basqarma ofıtserleri barlyq kúsh-jigerlerin jınap táýlik boıǵy aýysymǵa shyǵady», – dedi polkovnık Taımerdenov.
