Almatyda blogshylardyń ekinshi respýblıkalyq sleti ótedi
ALMATY. 30 mamyr. QazAqparat /Erbol Azanbek/ - 4 maýsym kúni Almaty mańyndaǵy «Aqerke» demalys aımaǵynda blogshylardyń ekinshi Respýblıkalyq sleti ótedi. Slet «YourVision» blog-tuǵyrnamasynyń úsh jyldyǵyna arnalady. Bul týraly sharanyń uıymdastyrýshylary habarlady.
Sharaǵa Qazaqstannyń barlyq óńirinen belsendi blogshylar jınalmaq. Slet barysynda Ortalyq Azııa men Qazaqstandaǵy ınternettiń damýy, ózekti máseleleri talqylanyp, blogshylar óz jetistikterimen bólisedi. Sondaı-aq
«BuharJerreau» hıp-hop tobynyń arnaıy kontserti ótedi. Slettiń eń basty sharalarynyń biri - jýrnalıster úshin blogshylar mektebi ashylady. Onda BAQ ókilderine blog ashý, posttar jazý, tehnıkalyq múmkindiktermen tanysý, aýdıo-vıdeolardy blogqa qoıý úıretiledi. Esterińizge sala keteıik, YourVision tuǵyrnamasynda jazatyn blogshylardyń birinshi sleti 2010 jyldyń 17 jeltoqsanynda ótken bolatyn.
YourVision (www.yvision.kz ) - Ortalyq Azııadaǵy eń tanymal blog-tuǵyrnamalardyń biri. 2008 jyly web-sheberler Stanıslav Ignatov pen Raýan Maemırovtiń bastamasymen iske qosylǵan. 2010 jyly Ulttyq AWARD.kz ınternet júldesiniń Gran-prı júldesimen «Jyldyń úzdik saıt» ataǵyna ıe boldy. 20 myńnan astam blogshy tirkelgen, onyń 1500-i - eń belsendi blogshylar. Olardyń árqaısysy osy kúnge deıin 150 myńnan astam post jazǵan. Blog-tuǵyrnamany kúnine 40 myń adam oqıdy. Eń tanymal blogshylar qatarynda Ánýar Nurpeıisov, Erjan Súleımenov, Kamıla Júsipova, Roman Raıfeld, Evgenıı Jaǵaltaev, Aleksandr Lıahov syndy tanymal tulǵalar bar.
Sońǵy ýaqytta elimizde blog júrgizý qatty qarqyn alyp otyr. Bıylǵy jyldyń naýryz aıynda qazaq tildi blogshylar da ózderiniń alǵashqy quryltaıyn ótkizgen bolatyn. Búgingi tańda elimizde jalpy sany 25 myńǵa jýyq tirkelgen blogshylar bar.
