Almatyda bıznestiń 45% áıelder basqarady
ALMATY. QazAqparat – Almatyda «Women in business» kásipker áıelderdiń ekinshi forýmy ótip jatyr, dep habarlaıdy QazAqparat tilshisi.
Forýmǵa qatysýshylar bıznes orta, áıelder bıznesi, ekonomıkalyq saıasat, qalalar ınfraqurylymy, mádenıet jáne ekologııa, salalyq mamandaný, ekonomıkanyń álemdik trendterin damytýdyń ózekti máselelerine nazar aýdardy.
«Atameken» QR UKP Іsker áıelder keńesiniń tóraıymy Lázzat Ramazanovanyń aıtýynsha, Almatydaǵy bıznestiń 45 paıyzyn áıelder basqarady. Jumys istep turǵan 174,5 myń shaǵyn jáne orta bıznestiń 78 myńyna áıelder jetekshilik etedi.
«Respýblıkada bul kórsetkish 43%-ǵa teń (1,2 mln kásipkerdiń ishinde 536 myńy áıel). Olar byltyr «Atamekenniń» uıymdastyrǵan bıznes sabaǵyna qyzyǵýshylyq tanytty. «Eńbek» baǵdarlamasy aıasynda Qazaqstanda 75 myń adam kýrsty oqydy, olardyń 40 700-i názik jandylar. «Bastaý» jobasy boıynsha kýrstan ótken 55 myń adamnyń, 30 500-i taǵy da áıelder. «Jas kásipker» jobasy aıasynda 10 myńnan astam kelinshek bıznestiń qyr – syryn úırendi», - deıdi Lázzat Ramazanova.
Spıkerdiń pikirinshe, qyzdardy tehnologııa jáne naqty ǵylymdarǵa qazirden bastap tartý qajet, sondaı-aq jahandyq ekonomıkalyq syn-tegeýrinderdi eskere otyryp, áıelderge arnalǵan kásipkerlikti damytý baǵdarlamaryn qurý, kásipker áıelderdiń isine nesıe berý baǵdarlamalaryn qoljetimdi etý, qarjyǵa qoljetimdiliktiń jańa platformalaryn qurý (mysaly, kraýdfandıng, venchýr arqyly) qajet.
