Almatyda bıznesmendi urlap 1 mln dollar bopsalaǵandar sottaldy

Eki er adam qylmystyq áreketke byltyr jazda barǵan.

Polıtseıler bir baǵyttaǵy Jeltoqsan kóshesinen jol erejesin óreskel buzyp, qarama-qarsy baǵytta ketip bara jatqan «Toıota Kamrı» kóligin toqtatqan.

Kólik salonyn teksere kele, polıtseıler kókala qoıdaı bolyp sabalǵan er adamdy alyp shyqqan. Keıin belgili bolǵandaı, ol kisi bıznesmen eken. Ony jańaǵy úsh adam urlap ketip, otbasynan 1 mln dollar talap etpek bolǵan.

«Bizdiń «toqta» degen buıryǵymyzdy qaperine de ilmegen júrgizýshi Pýshkın kóshesiniń boıyndaǵy úılerdiń aýlasyna tyǵylǵan. Kóliktegi eki jolaýshy qashyp ketti. Júrgizýshi kórsetken qarsylyǵyna qaramastan, sol jerde ustaldy», - dedi ІІD arnaıy batalon polkiniń ınspektory Eldos Ábdirahymov.

Medıtsına qyzmetkerleri japa shegýshige der kezinde kómek kórsetti.

Qazir qylmys jasaǵan tulǵalardyń kim ekendigi anyqtaldy. Qashyp ketken eki kúdiktige izdeý jarııalandy. Kólikten sondaı-aq betperde, jalǵan memlekettik tirkeý nómirleri, travmatıkalyq tapansha tabyldy.

45 jastaǵy kólik júrgizýshisiniń buryn da birneshe ret alaıaqtyq, aqsha bopsalaý, esirtki qylmysy úshin qylmystyq jaýapkershilikke tartylǵany anyqtaldy.

Keıinnen qashyp ketken eki adam ustalǵan bolatyn.

Almaty aýdanaralyq qylmystyq ister boıynsha mamandandyrylǵan sotynyń úkimimen A.V. Nııazov men I.D. Ten QR QK 125-baby, 194-baby jáne 380-baby boıynsha aıypty dep tanylyp, olardyń árqaısysy 11 jylǵa bas bostandyǵynan aıryldy.

Al, qylmyskerlerdi úıinde jasyryp kelgen azamattarǵa qatysty qylmystyq is bólek óndiriste qozǵaldy.

Aıta ketý kerek, QR Prezıdentiniń jarlyǵymen qylmyskerlerdi der kezinde ustaǵan Eldos Ábdirahymov ІІ dárejeli «Aıbyn» ordenimen marapattaldy.