Almatyda bızneske kelgen shyǵyn shamamen 44 mlrd teńgeni qurap otyr – UKP

NUR-SULTAN. QazAqparat – Almaty qalasy men basqa óńirlerde buzaqylyq saldarynan kelgen shyǵyn kólemin anyqtaý jumysy júrip jatyr, dep habarlaıdy QazAqparat «Atameken» ulttyq kásipkerler palatasyna silteme jasap.

7 qańtardaǵy jaǵdaı boıynsha «Atameken» UKP call ortalyǵyna 755 qońyraý kelip túsken. Jáne 662 nysan boıynsha, onyń ishinde 14 iri saýda úıinde 519 quqyqbuzýshylyq faktisi tirkeldi. Zardap shekken sýbektiler qatarynda saýda, tamaqtaný oryndary, kólik, halyqqa qyzmet kórsetý salasy jáne qarjy nysandary bar. Sondaı-aq, «Qoramsaq» qaýymdastyǵynyń málimetinshe, Almatyda 6 qarý-jaraq dúkeni tonalǵan.

Habarlamada aıtylǵandaı buzaqylyq saldarynan nysandar men ǵımarattardyń 70 paıyzy qıraǵan.

«Kelgen shyǵyn kólemi shamamen 44 mlrd teńgeni qurap otyr. Jáne keıbir qıraǵan nysandarǵa kirý múmkin bolmaǵandyqtan oǵan kelgen shyǵyndy esepteý ázirge múmkin emes», - deıdi vedomstvodan.

Odan bólek, 6 qańtardan 7-ne qaraǵan túni Almaty qalasyndaǵy Silk Way, Aport Mall jáne «Mechta» saýda jelisinde buzaqylyqtyń jalǵasqandyǵy aıtyldy.