Almatyda bızneske qarjylaı qoldaý kórsetý úshin 12,2 mlrd teńge bólindi
ALMATY. QazAqparat - Almaty Kásipkerlik jáne ınvestıtsııa basqarmasynyń basshysy Erkebulan Orazalın Almatydaǵy ShOB-ty qoldaý jáne ónerkásipti damytý, «Almaty Business-2025» baǵdarlamasyn júzege asyrý týraly aıtty, dep habarlaıdy QazAqparat tilshisi.
Almaty úshin shaǵyn jáne orta bıznestiń óte mańyzdy ekenin eskere otyryp, qala ákimdigi osy sektorǵa jan-jaqty qoldaý kórsetýde jáne ekonomıkany qalpyna keltirý úshin daǵdarysqa qarsy barlyq qajetti sharalardy qabyldap jatyr.
«Almaty Business-2025» baǵdarlamasy bıznespen jumys jasaýdyń bes negizgi ınstıtýtsıonaldy baǵytyn qamtıdy. Onyń quramyna Qolday kásipkerlik ortalyǵyn, nesıe berý úshin jeke jáne mıkroqarjy ınstıtýttaryn qurý, Almaty qalasy aýmaǵynda óndiristik parkterdi uıymdastyrý, keıbir kásipkerlerge jeke ári shaǵyn óndiristerin uıymdastyrýlary úshin jeńildetilgen nesıe usyný enedi.
E. Orazalın pandemııaǵa ári jyldyń kúrdeli bolǵandyǵyna qaramastan nesıeleýdi keńeıtý, ınfraqurylymdy damytý, óndiristi, kásipkerlikti qoldaý jáne jumys oryndaryn saqtaý sharalarynyń Almaty ekonomıkasyna oń áser etkenin atap ótti.
Máselen, Qolday kásipkerlik ortalyǵy 2020 jyly isterin jańadan bastaǵandarǵa, jalpy kásipkerlerge 90 myńǵa jýyq keńes berdi. Búgingi kúni jalpy somasy 42 mlrd teńgeni quraıtyn 52 joba boıynsha keńes berildi. «Bir tereze» qaǵıdaty boıynsha 500-den astam ruqsat qujattary usynyldy.
Ortalyqta ShOB ókilderine óz bıznesin damytýǵa qatysty túrli memlekettik organdar men uıymdardan ruqsat qujattaryn alý úshin tegin qoldaý kórsetiledi, sonymen qatar túrli qarjy ınstıtýttarynda qarajatty jeńildikpen alýlaryna kómektesedi.
«Biz kemshilikterdi joıyp, isterin jańadan bastaǵan kásipkerlerge 5 mıllıonǵa deıingi kólemde granttar berdik. Olar grant alǵannan keıingi alǵashqy kezeńde óz bıznesterin tegin júrgize alady. Ekinshi kezeńde bıznes-josparlardy ázirleý boıynsha ári zańgerlik jáne býhgalterlik keńester kórsetiledi. Eger ekinshi kezeńde óz bıznesterin durys júrgizip, ony keńeıtýdi qalasa, onda olar bizdiń shaǵyn qarjy ınstıtýttarymyzǵa júginip, 6%-dyq mólsherlememen jeńildetilgen nesıe alýlaryna bolady», — dedi E. Orazalın.
Onyń aıtýynsha, bul ınstıtýttar Almaty qalasy ákiminiń tikeleı tapsyrmasy boıynsha jergilikti bıýdjet qarjysy esebinen granttar kólemin ulǵaıtý aıasynda qosymsha ekojúıemen qamtylady.
Jalpy, bızneske qarjylaı qoldaý kórsetýge 12,2 mlrd teńge bólindi. Qarjylandyrýdy «Almaty Finance» nesıelik uıymy jáne «Almaty» MQU júzege asyrady. «Almaty Finance» 500 mıllıon teńgege deıin iri jáne orta jobalarǵa nesıe berýdi qarastyrady, «Almaty» shaǵyn jáne mıkrobızneske baǵyttalǵan ári munda nesıeniń eń joǵarǵy mólsheri 70 mln teńge deńgeıinde belgilengen.
Jalpy alǵanda 40-tan astam jobaǵa nesıe berildi.
Aıta keterligi, bul ınstıtýttar pandemııa kezinde dári-dármekpen qamtamasyz etýdi turaqtandyrý protsesterine de qatysty. Mysaly, osy qarjy ınstıtýttary tarapynan bólingen 12,2 mlrd teńgeniń 4 mıllıardy Almaty qalasyndaǵy iri dıstrıbıýterlik kompanııalarǵa, medıtsınalyq zattar men dári-dármekterdi jetkizýshilerge berildi. Osy oraıda Turaqtandyrý qoryn uıymdastyrý ıdeıasy týyndady. Tipti, ony elimizdiń ózge óńirleri de ilip áketip, utymdy paıdalana bastady. Qarjynyń qalǵan bóligi - 60%-ǵa jýyǵy óńdeý ónerkásibi salasyndaǵy jobalarǵa jumsaldy.
Óndiristik parkterdi uıymdastyrý tetigi de oıdaǵydaı jumys isteı bastady. Qalalyq ákimdik iri bızneske bos ǵımarattar men qurylystardy qalpyna keltirýge nemese jańa oryn salýy úshin 6%-ben jeńildetilgen nesıe beredi.
