Almatyda bıznesi zardap shekken 3,5 myń kásipkerden ótinish tústi

ALMATY. QazAqparat - Almatyda jappaı tártipsizdik kezinde kásibine shyǵyn keltirilgen 3 592 adamnan ótinish tústi. Onyń ishinde 85 ótinish keri qaıtaryldy. Bul týraly onlaın brıfıng barysynda Almaty qalalyq kásipkerler palatasynyń dırektory Aıtýar Qoshmambetov aıtty, dep habarlaıdy QazAqparat tilshisi.

«23 qańtar men 23 aqpan aralyǵynda Infokazakhstan saıtyna almatylyq kásipkerlerden 1572 ótinish kelip tústi. Alaıda ótinishterdiń keıbiri birneshe ret qaıtalanǵan. Sondyqtan, kásipkerler palatasy aýdandyq ákimdiktermen birge zardap shekken kásipkerlerdi anyqtaý jóninde jumystar júrgizip, ótemaqy tóleý somasynyń qorytyndysyn shyǵardy»,- deıdi ol.

Tekseris qortyndysy boıynsha, 1413 kásipkerdiń bıznesi zardap shekkeni anyqtaldy. Olarǵa keltirilgen shyǵyn 34 316 437 000 tenge.

«Qazirgi ýaqytta arnaıy komıssııamen 755 ótinim qaraldy, olar 2,2 mlrd teńge. Memlekettik bıýdjetpen 372 ótinish qaraldy, ol 1,2 mlrd teńge bolady», – dedi spıker.

Onyń aıtýynsha, ótinishterdiń 317-i saýda salasyna tıesili. Atap aıtsaq zergerlik buıymdar dúkeni, uıaly telefon, kıim-keshek jáne basqasy. Bıznes ortalyq boıynsha 34 ótinim, qoǵamdyq tamaqtaný nysandary boıynsha 26 ótinim, lombard – 4, baǵalaý kompanııasy men lızıngti termınaldar boıynsha 9 ótinim maquldandy.

«Memleket basshysynyń Bızneske jedel kómek kórsetý tapsyrmasyn iske asyrý aıasynda jeńildetilgen tetik boıynsha tólem somasy 10 mln teńgege deıin ulǵaıtyldy, sondaı – aq ótinimderdi qaraý merzimi eki esege-1 aıdan 2 aptaǵa deıin qysqartyldy», – dedi Aıtýar Qoshmambetov.