Almatyda bıznes alpaýyttary jastarǵa óz tájirıbelerimen bólisti
ALMATY. QazAqparat - Almatyda bıznes salasynyń maıtalmandary jastarmen kezdesti, dep habarlaıdy QazAqparat tilshisi.
BI Group dırektorlar keńesiniń tóraǵasy men aktsıoneri Aıdyn Rahymbaev, Globalink Logistics kompanııasynyń SEO Sıddık Han, Forbes Kazakhstan shyǵarýshysy Armanjan Baıtasov, Chocofamily Holding negizin qalaýshylardyń biri jáne SEO Ramıl Mýhorıapov, Phaeton DC negizin qalaýshy Marat Shotbaev ózderiniń tabysqa jetý qupııalaryn aıtyp berdi.
Olar sonymen qatar, praktıkalyq keısterimen jáne elde bıznes júrgizý boıynsha keńesterimen bólisti.
Ótken jyldan bastap YPO forýmy tabysty bıznes ókilderiniń jas kásipkerlermen tájirıbe almasýy úshin tıimdi alańǵa aınaldy. Spıkerler óz jetistikteriniń qupııasymen bólisip qana qoımaı, birqatar ózekti máselelerdi qozǵady.
Belgili jýrnalıst, medıasalada jetistikke jetken Armanjan Baıtasov jastarǵa medıabızneste qalaı tabys tabýdyń qyr-syryn úıretti.
«Men búgin jas kásipkerlerge medıajobalar fabrıkasy jobasy týraly aıtamyn. Biz jastarǵa óz jobalaryn usynýǵa nemese bizdiń jobalarǵa qatysýǵa múmkindik beremiz. Máselen, biz avto týraly baǵdarlama túsiretin bolsaq, jas kásipkerler kelip, óz usynystaryn aıtyp, bizdiń jobanyń qatysýshysy bola alady. Osylaısha bizdiń áriptesimiz bola alady», - dedi A.Baıtasov.
Onyń aıtýynsha, qazir medıanaryqta kez-kelgen kásipker tabysty bolýyna múmkindik bar.
«Medıanaryq - ósip kele jatqan naryqtardyń biri. Munda ıdeıa men júzege asyrý protsesiniń arasy óte qysqa. Eger, ıdeıa kúshti bolsa, oǵan ınvestor da, efır de tabylady», - dedi ol.
Armanjan Baıtasov búgingi forýmda jastarǵa medıabıznestegi basty trendter, sandar, málimetter týraly aıtyp bermek.
«Qazir bul naryqta qandaı mamandyqtarǵa suranys kóp? Men vebdızaıner týraly aıtar edim. Baǵdarlamalaýdy, aǵylshyn tilin qosyp úırenseńiz, sizge baǵa jetpes edi. Ol úshin tipti baspalarda tegin jumys isteýge bolady. Myqty maman bolyp alsańyz, shetelderde bolsyn kez-kelgen jobaǵa alynar edińiz. Sonymen qatar, mýltımedıalyq jýrnalıstıkaǵa suranys óte joǵary. Adam eger de jaqsy jumys isteı alatyn bolsa, jaqsy kontent jasaý úshin oǵan telefon men dıktafon ǵana jetkilikti», - dedi Armanjan Baıtasov.
Al BI Group dırektorlar keńesiniń tóraǵasy men aktsıoneri Aıdyn Rahymbaev osy ýaqytqa deıin jas kásipkerlerdiń 24 startap jobasyna ınvestıtsııa quıǵanyn aıtty.
«Bizdi sońǵy qyzyqtyrǵan jobamyz - Naimi.kz. Ol - bilikti mamandardy tabýǵa baǵyttalǵan joba. Bul jobaǵa 1 mln AQSh dollary kóleminde ınvestıtsııa saldyq. Jaqyn arada ózin aqtaıtyn bolady dep senemiz. Sonymen qatar, Baǵdat Mýsın basqaratyn qordyń jumysyna 10 mln AQSh dollary kóleminde ınvestıtsııa saldyq. Osy ýaqytqa deıin 24 startapqa qarajat quıdyq», - dedi Aıdyn Rahymbaev.
Onyń aıtýynsha, búgin jastarǵa 5 bilikti bıznes salasynyń myqty maıtalmany óz tájirıbelerin aıtady.
«Eń aldymen jas kásipkerlerdi «birinshi kapıtaldy tabý, komandamen qalaı jumys isteımin» degen suraqtar alańdatady. Basqarýshy kóshbasshynyń da róli bólek, árıne. Biraq bul jerde «jalǵyzdyń aty shyqpas» degendeı, bir adam jalǵyz ózi bıznes qura almaıdy. Jetistikke sátti qurylǵan bıznes strategııa men birligi jarasqan komanda ǵana jetkizedi», - dedi Aıdyn Rahymbaev.
Forým barysynda ár prezentatsııadan soń jastar ózderin alańdatqan suraqtarǵa jaýap aldy.
Aıta ketý kerek, byltyr osyndaı forým birinshi ret Astanada ótken bolatyn. Oǵan bıznes ıeleri ǵana emes, JOO stýdentteri qatysyp, bastapqy kapıtaldy qalyptastyrý, jumys, otbasy, hobbı arasyndaǵy tepe-teńdikti qalaı ustap turý jóninde qundy keńester alǵan bolatyn.
