Almatyda bıylǵy oqý jylynda 2 326 bala koronavırýs juqtyrǵan
Onyń aıtýynsha, Almatyda 75 mektep bir aýysymdyq, 194 mektep eki aýysymdyq, 1 mektep – úsh aýysymdyq rejımde jumys isteıdi.
«Qalada 1 qyrkúıekten bastap oflaın formatta 287 265 oqýshy oqıdy, onyń ishinde KVI ınfektsııasy - 1287 jaǵdaı tirkelgen. Onlaın rejımde 19 128 oqýshy oqıdy, onyń ishinde 1039 KVI jaǵdaıy, barlyǵy – 2326 jaǵdaı tirkelgen. Oflaın formatta oqıtyn oqýshylar arasynda KVI juqtyrý sany onlaın rejımde oqıtyn oqýshylar arasynda juqtyrý jaǵdaıynan 12 ese tómen, óıtkeni mektepterde shekteý sharalary ornatylǵan, profılaktıkalyq jáne epıdemııaǵa qarsy is-sharalardyń saqtalýyna baqylaý júrgiziledi», -deıdi ol.
Sonymen qatar ol mektep oqýshylarynyń arasynda indet qarqyny baıaýlaǵanyn aıtty.
«Jalpy, oqýshylar arasynda KVI dertin juqtyrýdyń tómendeýi baıqalady, eger tamyz-qyrkúıek aılarynda táýligine KVI juqtyrýdyń 100-den astam jaǵdaıy tirkelse, qazirgi ýaqytta KVI 38-46 jaǵdaıǵa deıin tómendedi», -deıdi Almaty ákiminiń orynbasary.
COVID-19-dyń aldyn alý jáne onyń taralýyna jol bermeý maqsatynda mektepterde mynadaı sanıtarlyq-epıdemıologııalyq is-sharalar júrgizildi:
- bastaýysh, orta jáne joǵary synyptarǵa arnalǵan ǵımarattarǵa jeke kirý esikteri bólingen;
- áleýmettik qashyqtyq belgileri jańartyldy, mektep kireberisinde qyzmetkerler men ózge de kelýshilerdi tirkeý úshin «Ashyq» qosymshasynyń QR-kodtary bar (100%);
- zerthanalyq, praktıkalyq sabaqtardy qospaǵanda, kabınettik oqytý júıesi joıyldy;
- mektepter jýý jáne dezınfektsııalaý quraldarymen, sanıtaızerlermen qamtamasyz etilgen, jalpy paıdalaný oryndarynda (ashanalar, dálizder, sport zaldary)aýany zararsyzdandyrýǵa arnalǵan retsırkýlıatorlar ornatylady;
- ár aýysym aldynda oqýshylar men qyzmetkerlerdiń kúndelikti súzgisin ótkizý uıymdastyrylǵan;
- mektep qyzmetkerlerine tolyq ekpe jasaldy
«Epıdemııaǵa qarsy is-sharalardyń saqtalýyna turaqty baqylaý júrgizý úshin mektepterde bilim basqarmasynyń ókilderimen birlesip monıtorıng toby jumys isteıdi. Monıtorıngilik toptar 21 mektepti tekserdi, Áýezov, Alataý jáne Bostandyq aýdandarynyń 5 mektebinde shekteý is-sharalarynyń buzylýy anyqtaldy, buzýshylyqtardy joıý boıynsha usynystar berildi, osy baǵyttaǵy jumystar jalǵasýda», - dedi Erjan Babaqumarov.
Sonymen qatar, ol qalada vaktsınalaýǵa jatatyn muǵalimder 100% egilgenin atap ótti.
Almaty ákimi orynbasarynyń aıtýynsha, joǵary oqý oryndarynda da osyndaı jumystar júrgizilýde. Qalada barlyǵy 37 JOO bar. 2021 jylǵy 1-6 qyrkúıek aralyǵynda Almatyda onlaın oqytý rejıminde JOO stýdentteri arasynda KVI-diń 149 jaǵdaıy tirkeldi.
Vaktsınamen oqytýshylardy qamtý jalpy sanynan 80% (17 496 adam), stýdentterdi 50% (92 433 stýdent) quraıdy. Jumys jalǵasýda.
Joǵary jáne arnaýly orta oqý oryndarynyń jataqhanalary men oqý korpýstarynda Ashyq júıesi jáne termometrııa arqyly kirý júzege asqan, dezınfektsııalyq rejım kúsheıtildi, sanıtaızerler men retsırkýlıatorlar ornatylǵan, medıtsınalyq baqylaý kúsheıtildi.
