Almatyda bıylǵy I toqsanda 683 myńnan astam adam ataýly áleýmettik kómek aldy

ALMATY. QazAqparat - Aǵymdaǵy jyldyń mamyr aıynan bastap jumyssyzdardy qysqa merzimdi kýrstarǵa jiberý bastalady. Sondaı-aq, az qamtylǵan otbasylarǵa ataýly kómek beriledi. Bul týraly onlaın brıfıng kezinde Almaty qalasy áleýmettik ál-aýqat basqarmasynyń basshysy Nazıra Toǵyzbaeva málim etti, dep habarlaıdy QazAqparat tilshisi.

Jyl basynan beri azamattar óz bıznesin ashý jáne iske asyrý úshin 165 adam 583 myń teńgege deıin óteýsiz granttar aldy. Negizgi qyzmet túrleri — tigin isi, tamaq daıyndaý, manıkıýr, shashtaraz óneri jáne basqa da qyzmetter.

«Jumysta az qamtylǵan azamattardy áleýmettik qoldaý máseleleri mańyzdy oryn aldy. Aǵymdaǵy jyldyń birinshi toqsanynda áleýmettik tólemderdiń 17 túri men 28 myńnan astam adam qamtyldy. Eger otbasynyń bir múshesine shaqqandaǵy tabysynyń tómendigi kúnkóris deńgeıiniń 70 paıyzynan aspaıtyn bolsa, otbasylarǵa ataýly áleýmettik kómek tólenedi», — dedi basqarma basshysy.

Atalǵan ataýly áleýmettik kómekti jumys istese de, jalaqysy tómen azamattar, múgedekter, zeınetkerler jáne t.b. az qamtylǵan toptaǵylar ala alady. Kómek kórsetýdegi basty maqsat - jumysqa ornalastyrý jáne azamattarǵa qıyn jaǵdaıdan shyǵýǵa kómektesý.

«Sondyqtan eńbekke qabiletti kómek alýshylar jumyspen qamtý ortalyǵyna jumysqa ornalasý úshin jiberiledi. Bul osy otbasylardyń qarjylyq jaǵdaıyn odan ári jaqsarta alady. Sondaı-aq, ataýly kómek alýshylarǵa televızııalyq, abonenttik jalǵamalardy jetkizý jáne ornatý boıynsha qyzmetter tegin kórsetiledi», — dep qorytty Nazıra Toǵyzbaeva.

Eske salsaq, bıylǵy I toqsanda 683 myńnan astam adam ataýly áleýmettik kómek aldy. 1 sáýirdegi jaǵdaı boıynsha 135,7 myń otbasyndaǵy 683,4 myń adamǵa ataýly áleýmettik kómek taǵaıyndaldy. Aǵymdaǵy jyly osy maqsattarǵa bıýdjetten 122,8 mlrd teńge bólindi.