Almatyda bıyldan bastap memlekettik kommýnaldyq páter berý toqtatylady - qala ákiminiń orynbasary
ALMATY. Aqpannyń 9-y. QazAqparat /Erlik Erjanuly/ - Almatyda bıylǵy jyly paıdalanýǵa beriletin memlekettik kommýnaldyq 2 turǵyn úı múgedekter men ardagerlerge arnalǵan. Ony qala ákiminiń orynbasary Serik Seıdýmanov búgin jalǵa beriletin alǵashqy úıdiń qonystanýshylaryna 26 páterdiń kiltin tabys etý rásiminde aıtty,
dep habarlaıdy QazAqparat.
"Almatyda qazirgi tańda 1981 jyldan beri páter kezeginde 15 myń adam tur. Olardyń ishinde az qamtamasyz etilgen otbasylar da bar. 17 sanattaǵy bul azamattar endi jalǵa beriletin páter alýshylardyń tizimine engiziledi", dedi qala ákiminiń orynbasary. Al turǵyn úı basqarmasynyń bastyǵy Qaırat Nurqadilovtiń aıtýynsha, olardyń arasynan páter alǵashqy kezekte 1981-1983 jyldan beri kezekte turǵan azamattarǵa berildi. Sheksiz merzimge beriletin 1-3 bólmeli bul páterler bolashaqta jekege berilýi de múmkin. Ázirge bul másele sheshilgen joq. Búgin baspanaly bolǵandardyń biri Qapıza Daıynbaeva. "Joldasym porshen zaýytynda istegen, ózim buryn Almaty oblystyq balalar kitaphanasynda kitaphanashy, 2000-shi jyldan bastap Bank isi akademııasy kitaphanasynyń meńgerýshisi bolyp qyzmet atqaram. Eki qyzym, eki nemerem bar. Búgin sondaı-aq, Qazaqtyń ulttyq agrarlyq ýnıversıtetinde oqytýshy bolyp jumys isteıtin úlken qyzymnyń týǵan kúni. Sondyqtan bizdiń otbasymyzda búgin qos birdeı qýanysh qatar toılanatyn bolady", deıdi Qapıza Aqanqyzy.
