Almatyda bıyl jańa 50 aıaldama paıda bolady
ALMATY. QazAqparat – Almatynyń Alataý aýdanynda bıyl jańadan 50 aıaldama salynady. Osylaısha, qoǵamdyq kólik aıaldamalarynyń jetispeýshiligi tolyq sheshilmek, dep habarlaıdy QazAqparat tilshisi.
Almaty ákiminiń aıtýynsha, Alataý aýdanynda marshrýttyq jeliler, jyljymaly quram, sondaı-aq avtobýs aıaldamalary jetispeıdi.
Bul problemalar «Alǵabas», «Terekti», «Rahat-Mádenıet», «Uljan-2», «Shańyraq-1», «Qarasý», «Saıaly-2» shaǵyn aýdandarynda bar.
Osy shaǵyn aýdandarda 15 maýsymǵa deıin 3 jańa marshrýt ashylady, 4 marshrýt (№109, 129, 25, 57) uzartylady jáne kúsheıtiledi. Sonymen qatar, №115 marshrýttaǵy barlyq jyljymaly quram jańartyldy.
«Búginde búkil aýdan aýmaǵyna 50 jańa aıaldama qajet. Jyl sońyna deıin biz olardyń salýyn qamtamasyz etemiz. Osylaısha, aıaladama jetispeýshiligin tolyq sheshemiz»,- dedi Erbolat Dosaev.
Buǵan deıin Almatynyń qoǵamdyq kólik parki gazben júretin 105 jańa ekologııalyq taza jáne jaıly avtobýstarmen tolyqqan bolatyn.
