Almatyda bıyl úı kezeginde turǵan árbir tórtinshi otbasy páterli bolady
Aıta ketý kerek, páterler burynǵy atlet aýylynan berildi.
Qala ákiminiń aıtýynsha, el Prezıdentiniń tapsyrmasy boıynsha Almatyda «Nurly jol» baǵdarlamasynyń ınfraqurylymdyq jobalaryna 20 mlrd teńge, al daǵdarysqa qarsy baǵdarlama aıasynda turǵyn úı qurylysyna respýblıkalyq bıýdjetten 33 mlrd teńge bólingen.
Qalada ótken jyldan beri kezekte turǵandarǵa 4 myńǵa jýyq páter berilgen.
Bul kórsetkish 2014-2015 jyldarmen salystyrǵanda eki esege artyq.
«Almatyda «Nurly jol» baǵdarlamasy aıasynda alǵashqy bes jyl ishinde quny 140 mlrd teńge bolatyn 670 myń sharshy metr turǵyn úı salynady. Jyl qorytyndysy boıynsha úı kezeginde turǵan árbir tórtinshi otbasy tıesili páterin alady. Búgin biz kezekte turǵan 120 otbasyǵa páter kiltterin tapsyramyz, olardyń arasynda múgedekter, kópbalaly jáne tolyq emes otbasylar, memlekettik qyzmetkerler, bıýdjet qyzmetkerleri, áskerıler bar. Bulardyń basym kópshiligi - páter jaldap nemes týystarynyń úıin panalap, páter kezeginde uzaq turǵandar» - dedi B.Baıbek.
Almaty ákimi halyqqa páter bólýdi barynsha ashyq júrgizý úshin túrli sharalardyń júzege asqanyn jetkizdi. Budan bylaı úı kezegine qoıý jáne kezektiń jyljýy Elektrondy úkimet portaly arqyly júretin bolady. Sonymen qatar, alǵash ret kezektiń elektrondy ınventarızatsııasy engizilgen, ıaǵnı kezekte turǵandar jyl saıyn Turǵyn úı basqarmasyna kelmeı - aq dıstantsııalyq júıe arqyly ózine qatysty málimetti biledi. Taǵy bir jańalyq, SMS- habarlar arqyly da qajetti málimetti alýǵa bolady. Bulardan ózge, kezekte turǵandar arasynda avtonomdy keste arqyly páter bólý mehanızmi jyl aıaǵyna deıin engiziledi.
Atletter aýylynyń kesheni 23 gektar aýmaqty alyp jatyr, munda 14 turǵyn úı bar. Onyń aınalasy zamanaýı vıdebaqylaý júıesimen, órt qaýipsizdigmen tolyq qamtylǵan. Aýyl kesheninde HQKO, emhana, sýpermarket, bank jáne poshta bólimsheleri, polıtsııanyń tirek pýnkti jumys isteıdi. Atletter aýylyn salýǵa zamanaýı ári ekologııalyq taza materıaldar paıdalanyldy.
Atap óterlik jaıt, Alataý aýdany qurylǵaly beri mundaǵy turǵyndar sany 1,5 esege artyp, 200 myń adamǵa jetti. Segiz jyl ishinde aýdandy damytýǵa qala bıýdjetinen 200 mlrd teńgeden astam qarjy bólindi, sonyń arqasynda halyqaralyq deńgeıdegi Almaty Arena sport nysany, ákimdik, sot, prokýratýra, salyq, arnaıy HQKO, AІІD ǵımarattary, zamanaýı mádenı nysandar, mektepter, bala baqshalar, emhanalar men aýrýhanalar iske qosyldy. Jańa meshit salynyp jatyr. Úlken Almaty kanalynyń aınalasy, Boraldaı ózeniniń jaǵalaýy abattandyryldy.
