Almatyda bıyl sońǵy 20 jyldaǵy tuńǵysh mádenıet nysany salynady - Mádenıet basqarmasynyń bastyǵy
ALMATY. 20 naýryz. QazAqparat - Almaty qalasynda 25 naýryzda «Mádenıet jyly» jarııalanady. Bul týraly Mádenıet basqarmasynyń bastyǵy Qaırat Qulbaev búgin baspasóz máslıhatynda málimdedi.
Qala ákimi 8 aqpanda turǵyndar aldyndaǵy esepti kezdesýinde aǵymdaǵy jyldy «Mádenıet jyly» dep jarııalaý týraly usynys aıtyp, ol turǵyndar tarapynan qoldaý tapqan bolatyn. Q. Qulbaevtyń aıtýynsha, bul shahardaǵy mádenıettiń damýyna tyń serpilis bermek.
«Bıyl jyl sońyna deıin 28 gvardııalyq panfılovshylar saıabaǵyndaǵy dańq memorıaly, Yqylas atyndaǵy halyq mýzykalyq aspaptar murajaıy qaıta jańartylyp, Saparǵalı Begalın atyndaǵy memlekettik balalar kitaphanasyna kompıýterlik júıeniń dybystyq, beıneproektsııalyq jańa tehnologııalaryn engizý josparlanyp otyr. Sondaı-aq, Alataý aýdanynda 1 myń adamdyq kópsalaly kontsert zalynyń qurylysy bastalyp, Boraldaı saq qorǵandary arheologııalyq mádenı kesheni jobasynyń tehnıkalyq ekonomıkalyq negizdemesi jasalady», - deıdi Qaırat Rahymjanuly. Onyń aıtýynsha, aǵymdaǵy jyly Mádenıet basqarmasynyń bıýdjeti ótken jylmen salystyrǵanda 1 paıyzǵa ulǵaıyp otyr. «Mádenıet jyly» aıasynda júzege asyrylatyn kóptegen sharalar seriktester men demeýshiler kómegimen jasalady. Sondyqtan oǵan jumsalatyn qarjy kólemi áli naqtylanǵan joq.
