Almatyda bıyl paıdalanýǵa berilgen turǵyn úı kólemi artty

ALMATY. QazAqparat- Almatyda 2021 jyly turǵyn úı qurylysynyń kólemi 8% artty. Bul týraly óńirlik kommýnıkatsııalar qyzmetiniń baspasóz konferentsııasy barysynda qalalyq josparlaý jáne ýrbanıstıka basqarmasynyń basshysy Almashan Ahmedjanov málim etti, dep habarlaıdy QazAqparat tilshisi.

Onyń aıtýynsha, pandemııa kezeńinde paıdalanýǵa beriletin turǵyn úı kólemi tómendegen joq, kerisinshe 8%-ǵa ósti.

Bıylǵy jyldyń 11 aıynda kommertsııalyq qurylys esebinen 13 322 páter jáne bıýdjet esebinen 1 326 páter paıdalanýǵa berildi.

Sondaı-aq, 10 myń sharshy metrden astam jataqhana jáne 2 313 jeke turǵyn úı salyndy.

Almashan Ahmedjanov turǵyn úıdiń qoljetimdiligin arttyrý – Memleket basshysy qoıǵan basym mindetterdiń biri ekenin aıtty.

Sonymen qatar, ol jańa turǵyn úıler negizinen qalaǵa qosylǵan aýmaqtarda salynatynyn, bul «Jańa Almatynyń» damýyna yqpal etetinin málim etti.

Qalanyń bas sáýletshisi atap ótkendeı, jańa turǵyn úımen birge qalada áleýmettik ınfraqurylym qurylyp, mektepter men balabaqshalar boı kóterip jatyr.

Qazirgi ýaqytta megapolıste 12,5 myńnan astam oqýshy ornyna arnalǵan segiz memlekettik mekteptiń qurylysy júrip jatyr.

Onyń úsheýin (5 myńnan astam orynǵa) jyl sońyna deıin tapsyrý josparlanǵan.

«Oqý jylynyń basynan beri 2 656 oryndy 13 jekemenshik mektep ashyldy. Jyl sońyna deıin 8 263 oryndy 17 japsarlas qurylys salý josparlanǵan bolatyn. Olardyń 11-ine balalar partaǵa otyrdy. Osylaısha, jyl sońyna deıin 16 myńnan astam jańa oqý orny ashylady», - dedi Almashan Ahmedjanov.

Sonymen qatar, Almatyda úsh memlekettik balabaqshanyń qurylysy aıaqtaldy (360 oryndy), 72 jekemenshik balabaqsha ashyldy (4,7 myń oryndy).

Qala ákimi Baqytjan Saǵyntaev «Almaty – 2050» Strategııasynda belgilengen «shetsiz qala» qaǵıdatyn ustana otyryp, turǵyn úı sharshy metrlerin zamanaýı mekteptermen, balabaqshalarmen jáne densaýlyq saqtaý obektilerimen birge engizý mindetin alǵa qoıǵan bolatyn.