Almatyda bıyl kóktem erte shyǵady - Qazgıdromet

ALMATY. QazAqparat- Bıyl Almatyda kóktem erte shyǵady. Bul týraly óńirlik kommýnıkatsııalar qyzmetinde ótken baspasóz máslıhatyna Astanadan onlaın qatysqan «Qazgıdromet» RMK gıdrologııa departamentiniń dırektory Ádil Ahmetov aıtty, dep habarlaıdy QazAqparat tilshisi.

Ádil Ahmetovtyń aıtýynsha, aldyn ala boljam boıynsha Almatyda kóktem erte shyǵady.

Naýryzdyń birinshi onkúndiginde aýa temperatýrasy +2+7°S, kúndiz +10+15°S deıin kóteriledi.

Orta eseppen alǵanda aýa temperatýrasy klımattyq normadan 1 gradýsqa joǵary bolady.

«Naýryz aıyndaǵy ortasha aılyq temperatýranyń normasy - 2,7 ° C, mundaı kezde naýryz aıynda kúnniń birden jylynýy jaǵymsyz jaǵdaıǵa jatady. Jáne dál osy aıda aýa temperatýrasynyń qatty joǵarylaý úrdisi baıqalady. Mundaı kezde qys boıy qordalanǵan qalyń qardyń birden erý qaýpi joǵary. Sondaı-aq, Almatyda jylý tolqyndarynyń qaıtalaný jıiligi artyp keledi, sondyqtan qystyń sońy men kóktemniń basynda aýa temperatýrasynyń kúrt jylynýynan qaýip artady», - dedi Qazgıdromet ókili.

Ádil Ahmetov Almatyda jylylyq sezilip, aýa temperatýrasy aıtarlyqtaı kóterilip kele jatqanyn aıtty.

«1976 jyldan bastap ortasha jyldyq temperatýra ár 10 jyl saıyn shamamen 0,5°S-qa kóterildi. Jyldyń barlyq aılarynda temperatýra turaqty túrde kóteriledi. Temperatýra eń joǵary jyldamdyqpen naýryzda kóteriledi - 10 jyl saıyn 1,3 °S-qa, al aqpanda - 10 jyl saıyn 1,3 °S-qa kóteriledi»,- dedi ol.

Spıker kórshiles oblystardaǵy jaǵdaıǵa da toqtaldy.

«5 aqpanda Almaty oblysynyń taýly aımaqtarynda jaýyn-shashyn, qar jaýady. Taýly jáne taý bókterindegi aýdandarda tuman, kóktaıǵaq kútiledi. Ońtústik-batystan soǵatyn jel shyǵysqa aýysady, oblystyń ońtústiginde ekpini 15-20 m/s. 1 aqpandaǵy jaǵdaı boıynsha Іle Alataýynyń soltústik betkeıindegi, Jetisý Alataýynyń ózen alaptarynda ylǵal jınalý kezeńindegi jaýyn-shashyn mólsheri ortasha jyldyq mánnen 15-21%-ǵa joǵary, al Іle Alataýynyń ońtústik betkeıi men Ketmen jotasynyń soltústik betkeıindegi ózenderdiń basseınderinde ortasha jyldyq mánder sheginde 15-21%-ǵa joǵary»,- dedi Ádil Ahmetov.

Sonymen qatar ol Almatynyń ońtústik jartysynda aqpan aıynda jaýatyn jaýyn-shashyn mólsheri normadan joǵary bolatynyn atap ótti.

«Qardaǵy sý qorynyń kólemine, topyraqtyń kúzgi ylǵaldylyǵyna, topyraqtyń qatý tereńdigine taldaý jasaı otyryp, Almaty oblysy sý basý qaýpi joǵary óńir retinde aldyn ala baǵalandy. Gıdrometeorologııalyq jaǵdaı kúrt ózgergen jaǵdaıda «Qazgıdromet» RMK sý tasqyny qaýpi týraly 2-3 kún buryn daýyldy eskertýmen habarlaıdy»,- deıdi spıker.