Almatyda bıyl «Eski baspana» baǵdarlamasy boıynsha 26 jańa úı turǵyzylady
ALMATY. QazAqparat - Almatyda bıyl «Eski baspana» baǵdarlamasy boıynsha 26 jańa úı turǵyzylady. Mundaı málimetti búgin jýrnalıstermen kezdesý barysynda «Kúrdeli qurylys kásiporny» JShS dırektory Mazan Serǵazın habarlady.
Onyń aıtýynsha, 2013 jyly atalǵan baǵdarlama boıynsha 5 úı, 2014 jyly - 17 úı boı kóterse, 2015 jyly 26 úı salynady.
Jalpy qalada súrilýi tıis eski úılerdiń sany 600-den asady. Olardyń kóbi Jetisý jáne Túrksib aýdandarynda shoǵyrlanǵan.
Mamannyń aıtýynsha, úılerdi súrýde basty kedergi qujattyq rásimdeýde bolyp otyr. Úılerdiń kópshiligi 1991 jylǵy jekeshelendirý kezinde durys rásimdelmegen.
«Jekeshelendirý pasportyndaǵy úıdiń aýdany Tehnıkalyq túgeneý bıýrosynyń usynǵan pasportyndaǵy málimetpen sáıkes kelmeı qalady. Sondaı-aq, Túrksib aýdanynda kóptegen úılerge japsarlas bólmeler zańsyz salynǵan. Ondaı úıdiń ıeleri ózderi rásimdegen úıleriniń aýdanyna parapar úı berilýin talap etedi», - dep qorytyndylady Mazan Serǵazın.
«Eski baspana» baǵdarlamasy - Almatyda júzege asyrylyp otyrǵan respýblıkadaǵy jalǵyz joba. 2013 jyldan beri qalada 22 kópqabatty úı paıdalanýǵa berildi. Almatyda «Eski baspana» baǵdarlamasy boıynsha súrilýi tıis baspananyń sany 940. Olardyń 600-i 2020 jylǵa deıin súriledi.
Baǵdarlama bıýdjeti 24 mlrd 800 mln teńgeni quraıdy. Onyń 4 mlrd-y eski úı turǵyndaryn jańa úıge kóshirýge baǵyttalsa, qalǵany bosaǵan aımaqtarda jańa úı salýǵa jumsalady.
