Almatyda bıyl energetıka jelilerin qaıta qurýǵa 50 mlrd. teńge bólindi
ALMATY. QazAqparat- Almatyda 2015 jyly energetıka jelilerin qaıta qurýǵa 50 mlrd. teńge bólindi. Bul týraly búgin «Orbıta» dep atalatyn jańa qazandyqty iske qosý rásimi barysynda belgili boldy, dep habarlaıdy Almaty qalasy ákiminiń baspasóz qyzmetinen.
Shara barysynda qala ákimdiginiń ókilderi jylý-energetıka salasyna qarjy jumsaý aldaǵy jyly da jalǵasyn tabatyndyǵyn jetkizdi. Óıtkeni, qalany damytýda bul salanyń mańyzy óte zor.
Qazirgi tańda elimizde memlekettik jáne jergilikti bıýdjet, sondaı-aq ınvestorlar arqyly búkil jylý energetıkalyq keshendi josparly túrde jańǵyrtý saıasaty júrgizilip jatyr.
Aıta ketelik, ınjenerlik jelilerdi qaıta qalpyna keltirý - «Almaty qalasyn damytý-2020» baǵdarlamasynyń basymdy baǵyttarynyń biri. Osy baǵdarlamaǵa sáıkes, jylý jelileriniń tozý deńgeıi 2020 jylǵa deıin 67 paıyzdan 54 paıyzǵa deıin tómendetilýi tıis.
