Almatyda bıyl eki júzden astam kóshe jóndeýden ótedi
ALMATY. QazAqparat- Almatyda 2023 jylǵa arnalǵan jol jóndeý jumystarynyń jospary bekitildi. Ortasha jóndeý jumystary jalpy uzyndyǵy 200 shaqyrymnan asa eki júzden astam kóshege júrgiziletin bolady, dep habarlaıdy QazAqparat tilshisi.
Almaty ákimdigi málim etkendeı, jóndeý jumystaryna qala bıýdjetinen 20 mlrd teńge bólindi. Ortasha jóndeý kezinde joldyń tozyǵy jetken joǵarǵy qabatyn qalpyna keltirý úshin keshendi jumystar júrgiziledi.
Jumystar qurylymdyq saraptama nátıjesin alyp, tıisti satyp alýlar aıaqtalǵannan keıin sáýir aıynda bastalady dep josparlanǵan. Magıstraldyq kóshelerdegi ortasha jóndeý jumystary 27 tamyzǵa deıin, al aýdandyq máni bar kóshelerdegi jumystar 30 qazanǵa deıin júrgiziletin bolady. Jumystar bastalar aldynda naqty kósheler tizimi men jumys ýaqyty aldyn ala jarııalanady.«Jol aqaýlaryn shuǵyl tegisteýdi kózdeıtin aǵymdaǵy jóndeý aıasynda Almatyda jol boıyndaǵy shuqyrlar men jaryqtar tegistelip, lıýkter rettelip, taǵy basqa aǵymdyq jumystar júrgiziledi. Osy jumystardy iske asyrý úshin qala bıýdjetinen 2,8 mlrd teńge bólinip otyr. Josparǵa sáıkes 350 myń sharshy metr jol aǵymdaǵy jóndeýden ótedi, sondaı-aq 30 km trotýar men 40 aıaldama kesheni jóndeledi. Jyl sońynda qanaǵattanarlyq jáne ortasha deńgeıdegi jol úlesin 89%-ǵa jetkizý josparda»,- dep habarlady qalalyq ákimdiktin baspasóz qyzmeti.
Sonymen qatar, jol qurylysy josparyna 6 shaǵyn aýdanda 30 km jańa jol salý engizilgen. Joldar ınjenerlik kommýnıkatsııalardyń iske qosylýyna qaraı 2023-2024 jyldary qoldanysqa beriletin bolady.
Qala turǵyndary 1 naýryz kúni bastalǵan «Halyq qatysatyn bıýdjet» baǵdarlamasy boıynsha trotýarlardy salý jáne jóndeýge ótinish bere alady. Ótinimder 30 naýryzǵa deıin qabyldanady.
Eske salsaq, Almaly aýdany turǵyndarymen kezdesýi kezinde Almaty ákimi Erbolat Dosaev «Halyq qatysatyn bıýdjet» baǵdarlamasyn júzege asyrý úshin 2023 jyly qosymsha 7 mlrd teńge bólingendigin habarlaǵan bolatyn. Bul sheshim baǵdarlamanyń tıimdiligin eskere otyryp qabyldandy. Qosymsha qarajat qalanyń 8 aýdany arasynda bólinetin bolady.
«Halyq qatysatyn bıýdjet» baǵdarlamasy boıynsha qajetti keńesti Almaty qalasynyń aýdandyq ákimdikterinde, sondaı-aq Almaty ákimdiginiń Open Almaty qoǵamdyq qabyldaýynda 224 39 29 (vn. 203), 1308 nomerleri arqyly alýǵa bolady.
