Almatyda bıyl biryńǵaı derekter bazasy iske qosylady
Almaty qalasynyń biryńǵaı derekter bazasynyń (BDB) arqasynda memlekettik organdar, kommertsııalyq uıymdar men akademııalyq ınstıtýttar derektermen almasa alady.
Aıda Dármenovanyń aıtýynsha, 2020 jylǵy pandemııa kezeńi qalalyq biryńǵaı derekter bazasyn qurý qajettigin kórsetti.
«Qazirgi kezde qala boıynsha derekter vertıkaldi vedomstvolyq qaǵıdat boıynsha jınalady (basqarmalardan jetekshilik etetin mınıstrlikterge), bul qala boıynsha túrli derekterdi alý, taldaý jáne ıntegratsııalaý kezinde qıyndyqtarǵa alyp keledi. Bul rette mańyzdy qalalyq derekterdiń ıeleri tek memlekettik organdar ǵana emes, kommertsııalyq kompanııalar ekenin de eskerý qajet. Sondyqtan biryńǵaı derekter bazasyn qurý týraly sheshim qabyldandy, oǵan Almaty qalasy ákimdiginiń barlyq basqarmalarynyń, vedomstvolyq baǵynyshty jáne seriktes uıymdarynyń derekteri jınalýy tıis», - dep túsindirdi Aıda Dármenova.
Aıta ketý kerek, almatylyq ádis Qazaqstan naryǵynda biregeıi – ádette, derekter bazasy tek memlekettik jáne kommertsııalyq derekter qory úshin ǵana jasalatyn.
Tsıfrlandyrý basqarmasynyń ókili biryńǵaı derekter bazasyn ázirleý kezinde 30 jyl boıy ulttyq jáne jergilikti deńgeıdegi memlekettik organdar jumys isteıtin Sıngapýrdyń tájirıbesin paıdalanǵanyn aıtty.
Bul rette BDB-nyń otandyq derekter bazasy Almaty turǵyndary men bıznestiń qajettilikterine negizdele otyryp qurylady.
«Derekterdi tıisti túrde basqarý adamnyń derekter sońynan «júgirýin» emes, derekterdiń adamnyń sońynan «júgirýine» múmkindik beredi. Muny is júzinde júzege asyrý úshin ótken jyldyń tórtinshi toqsanynan bastap bizdiń Tsıfrlandyrý basqarmasy CrimsonLogic jáne «Alseko» kompanııalarymen birlesip, Almaty boıynsha jeke tulǵalardyń derekterin jáne «Alseko» kommýnaldyq tólemderdiń biryńǵaı bazasyn ıntegratsııalaý boıynsha pılottyq jobany iske asyra bastadyq», - dedi Aıda Dármenova.
Buryn «Alseko» jaǵdaıyna taldaý júrgizildi, onda qalanyń ákimshilik aýdandarynda turatyndardyń sany boıynsha 2020 jyldyń birinshi jartyjyldyǵynda kommýnaldyq tólemderdi tóleý somasy zertteldi.
«Biz Jetisý jáne Naýryzbaı aýdandaryn mysal retinde qarastyrdyq. Bul rette Jetisý aýdanynda tirkelgen turǵyndar sany 30%-ǵa kóp, biraq tólem somasy Naýryzbaı aýdanyna qaraǵanda 15 ese joǵary. Osylaısha, Naýryzbaı aýdanynda kommýnaldyq qyzmetterdi jetkizýshiler bazalarynda tirkelgen adamnan góri áldeqaıda kóp adam paıdalanady dep boljaýǵa bolady», - dedi spıker.
2021 jylǵy naýryzda biriktirilgen derekter kommýnaldyq tólemder túbirtekterinde paıda boldy, onda naqty mekenjaıda tirkelgen azamattardyń sany kórsetilgen. Integratsııa nátıjesinde kommýnaldyq qyzmetterdi jetkizýshilerdiń bazalary edáýir artty: jetkizýshige baılanysty 23% jáne odan da kóp.
«Mysaly, «Almaty Sý»-da tutynýshylar bazasy 258 myńǵa jýyq adamǵa artty. Jeke esepke alý aspaptary joq jeke shottarda 87 myńnan astam tutynýshy anyqtaldy, bul kompanııanyń tek naýryz aıynda esepteýleriniń 58,7 mln teńgege jáne tıisinshe sáýir aıynda 55,5 mln teńgege ulǵaıýyna ákeldi», - deıdi Tsıfrlandyrý basqarmasynyń ókili.
Osy derekterdiń arqasynda kommýnaldyq qyzmetterdi jetkizýshi kompanııalardyń kiristerin ulǵaıtý esebinen kommýnaldyq qyzmetterdiń ınfraqurylymdaryn jańǵyrtý jáne keńeıtý boıynsha jumystar júrgiziledi dep josparlanýda.