Almatyda bıyl bes adam poıyz astyna túsken
Bul týraly óńirlik kommýnıkatsııalar qyzmeti alańynda Almaty qalasy Qazaqstan Temir joly jol dıstantsııasynyń bas ınjeneri Darhan Abdýllaev aıtyp berdi, dep habarlaıdy QazAqparat tilshisi.
Spıkerdiń aıtýynsha, temirjol boıynda adamdardyń jaraqat alýynyń negizgi sebepteri - temirjolda ruqsat etilmegen oryndardan ótýi, jaıaý júrginshiler kópirleri men ótpelerdi paıdalanbaýy, temirjol kóligi obektilerinde alkogol iship, mas kúıde júrýi bolyp tabylady.
Ásirese, balalar qaýipti aımaqta qaraýsyz qalyp, temirjoldy oıyn alańyna aınaldyratyn jaǵdaılar alańdatady.
«Mysaly, ótken jyly 27 jeltoqsanda Almaty -1 stantsııasy boıynsha eki jasóspirim jabyq vagonǵa kóterilip, tok kerneýine tústi. Tergeý barysynda jasóspirimder petardalardy jarý úshin temirjol joldaryna baryp, jabyq vagonnyń tóbesine kóterilgeni anyqtaldy. Bul árekettiń sońy qaıǵyly jaǵdaıǵa ákep soqty», - dedi Darhan Abdýllaev.
Ol sondaı-aq temirjol boıynda mal jaıylatyn jerler anyqtalyp, bıyl 77,4 shaqyrym mal qorshaýyn salý josparlanyp, iske asyp jatqanyna toqtaldy.
«Búginde temirjol boıynda jalpy uzyndyǵy 1648,1 shaqyrym mal qorshaýy salynǵan, ıaǵnı 70,5 paıyz qorshaýmen qamtylǵan. Jalpy, bıyl lokomotıv brıgadalary temirjol ústinde qaraýsyz júrgen maldyń kesirinen 110 ret shuǵyl tejeldi, bul jaǵdaı ótken jyly 237 ret boldy. Onyń ishinde 41 jaǵdaıda mal basyldy. Mundaı jaǵdaıda mal ıeleri anyqtalyp, olarǵa shara qoldaný úshin «Almaty-1» jelilik polıtsııa bólimine aqparat berildi», - dedi spıker.
Búginde temirjol ótkelderinde poıyzdardyń avtokólikpen soqtyǵysýy úlken alańdaýshylyq týdyrady.
«Bıyl 2 tamyz kúni «Audi-100» markaly avtokóligi Іle – Jetigen aralyǵynyń 1630 shaqyrymynda ornalasqan temirjol ótkelinde №2486 júk poıyzymen soqtyǵysty. Nátıjesinde vagon, ınfraqurylym obektileri búlindi. Jalpy, «QTJ «UK» AQ fılıaly – «Almaty magıstraldyq jeli bólimshesi» qyzmet kórsetý aımaǵynda 133 temirjol ótkeli ornalasqan. Onda shuǵyl tejeý qoldanylǵan faktilerge monıtorıng júrgizilip, temirjol ótkelderi arqyly ótý qaǵıdalary jıi buzylatyn temirjol ótkelderi anyqtaldy», - dedi spıker.
Sóz sońynda Darhan Abdýllaev quqyq buzýshylardy anyqtaý, temirjol ótkelderinde jol apattaryn boldyrmaý úshin «Sergek» beınekameralaryn ornatý qajet ekenin jáne temirjol boıynda qaıǵyly jaǵdaılar boldyrmaý úshin halyq tyǵyz ornalasqan jerlerde merdigerlik uıymdardyń kómegimen qorshaýlar salynsa degen ótinishin jetkizdi.