Almatyda bıyl 9 muzdy kóldiń sýyn azaıtýǵa 90 mln. teńge qarastyrylǵan
ALMATY. QazAqparat - Almatyda bıyl 9 muzdy kóldiń sýyn azaıtýǵa 90 mln teńge qarastyrylǵan. Bul týraly «Qazseldenqorǵaý» mekemesiniń basshysy Samat Dáýlenhanov aıtty, dep habarlaıdy QazAqparat tilshisi.
Mamandardyń aıtýynsha, Almaty mańaıynda 36 muzdy kól bar eken. Olardyń 17-si qaýipti kólder qataryna jatady. Al, 9 kól arnasynan asyp jarylýdyń az-aq aldynda tur.
Búgin taý shatqalynda quzyrly organ ókilderiniń qatysýymen kóshpeli jıyn ótti.
Byltyr qaýipti kólderdiń sýyn azaıtýǵa 61 mln. teńge jumsalǵan bolatyn.
Bul qarajatqa 6 muz kóldi bosatý boıynsha jumystar júrgizilip, 6,9 mln tekshe metr sý soryldy. Sondaı-aq, byltyr jergilikti bıýdjetten tereńdikke ornatylatyn 10 sorǵyshty satyp alýǵa 68 mln teńge bólingen edi.
«Qazseldenqorǵaý» AQPB MM bekitilgen qarjylandyrý josparyna sáıkes 2017 jyly muz kólderdi bosatýǵa 90 mln 76 myń teńge bólindi. Bul byltyrǵyǵa qaraǵanda 1,5 ese kóp. «Qazgıdromet» RMK málimetterine sáıkes bıyl Іle Alataý jotalarynyń bıik taýly aımaqtarynyń temperatýralyq kórsetkishi sel qaýipti kezeńdi biraz keshiktirdi. Bıyl «Aqsaı», «Qarǵaly», «Úlken» jáne «Kishi Almaty» ózenderi alaptarynda 8 bıik taýly maýsymdyq jáne 9 turaqty beket ashyldy. Osy maqsatta bıýdjetten 10 turǵyn úı modýlin satyp alýǵa 13 mln teńge bólindi», - dedi Samat Dáýlenkanov.
Mamandar qýaty saǵatyna 400 tekshe metr sý aıdaı alatyn sorǵysh ornatý arqyly 9 kóldegi sý deńgeıin azaıtýdy josparlap otyr.
Osy maqsatta 8 aýyr tehnıka (traktorlar, ekskavatorlar), 2 QR ІІM TJK men Almaty qalasy ákiminiń janyndaǵy qutqarý qyzmetiniń avıatsııalyq tehnıkasy, «Qazseldenqorǵaý» AQPB jeke quramynan 15 adam, merdiger uıymdardyń 130 adamy jumyldyrylady.
