Almatyda bıyl 9 mektep salynyp, iske qosylady - Ahmetjan Esimov
ALMATY. 17 tamyz. QazAqparat - Almatyda bıyl tuńǵysh ret bir jyldyń ishinde jańadan 9 mektep salynyp, paıdalanýǵa berilmek.
Ony qala ákimi Ahmetjan Esimov búgin «Bilim berý júıesin jańǵyrtý - adamı kapıtaldyń sapaly ósýiniń basty baǵyty» degen taqyryppen ótken bilim berý qyzmetkerleriniń tamyz keńesinde aıtty.
«Almatyda bıyl bilim berý salasyna 45 mıllıard 400 mıllıon teńge qarjy bólinip otyr. Byltyr ol 38 mıllıard teńgeni quraǵan bolatyn. Ósim 1 jylda 14 paıyz, al 3 jylda 1,5 ese ulǵaıdy. 1991-2007 jyldary tek 1 ǵana balabaqsha salynsa, sońǵy 3 jylda 20 memlekettik mektepke deıingi bilim berý mekemesi ashyldy. Balalardy balabaqshamen qamtý bıyl ótken jylmen salystyrǵanda 10 paıyzǵa artyp otyr», - dedi A. Esimov. Shahar basshysynyń aıtýynsha, jalpy bilim berý mekemeleriniń materıaldyq-tehnıkalyq bazasyn jaqsartýdan keıin endi oqytýshylardyń kásibı biliktiligin kóterý basty nazarǵa alynbaq. Pedagogtarǵa qoıylatyn talap ta qazir kún ótken saıyn ulǵaıyp kele jatyr. Olar óz isinde jan-jaqty, san-salaly bolýy kerek.
