Almatyda bıyl 6 myńnan astam turǵyndy baspanamen qamtý josparlanyp otyr
ALMATY. QazAqparat – Almatyda bıyl 6 myńnan astam turǵyn baspanamen qamtamasyz etiledi. Bul týraly Óńirlik kommýnıkatsııalar qyzmetiniń baspasóz konferentsııasynda Almaty qalasynyń Turǵyn úı saıasaty basqarmasynyń basshysy Danııar Qyryqbaev málim etti, dep habarlaıdy QazAqparat tilshisi.
Onyń sózinshe, búginde kommýnaldyq turǵyn úı qorynan baspana alý úshin kezekte 30 880 adam tur. Onyń ishinde: 1 908 – jetim bala, 3 268 – kópbalaly otbasy, 11 292 – bıýdjettik uıymdardyń qyzmetkerleri, 14 412 – halyqtyń áleýmettik osal toptary.
«Jyl basynan beri 1 909 azamat turǵyn úımen qamtamasyz etildi. Onyń ishinde 41 adam kommýnaldyq turǵyn úı qorynan páter aldy, ıaǵnı jaldamaly, satyp alý quqyǵynsyz, 1117 - «Shańyraq» baǵdarlamasy boıynsha 13,5 mlrd teńgege jýyq, taǵy 85 adam - «Baqytty otbasy» baǵdarlamasy boıynsha (2-10- 20) 118 mln 400 myń teńgege jáne 666 adam «Almaty jastary» baǵdarlamasy boıynsha (5-10-25) 8,8 mlrd teńge somasynda», - dedi Turǵyn úı saıasaty basqarmasynyń basshysy.
Danııar Qyryqbaevtyń aıtýynsha, bıyl 6 047 almatylyqty turǵyn úımen qamtamasyz etý josparlanǵan. Onyń ishinde 1 451 adam jaldamaly baspanaǵa satyp alý quqyǵynsyz kóshe alady, kezekte turǵan 401 adamǵa páter satyp alý quqyǵynsyz jalǵa (185 - kópbalaly otbasylar; 216 - halyqtyń áleýmettik osal toptary) beriledi. Jumys isteıtin 29 jasqa deıingi jastar úshin 1 050 páter satyp alý quqyǵynsyz 5 jylǵa jalǵa berildi, 35 jasqa deıingi «Almaty jastary» baǵdarlamasy boıynsha 1 000 páter .
«Almaty qalasynyń ákimi Baqytjan Saǵyntaevtyń tapsyrmasy boıynsha «Shańyraq», «Baqytty otbasy», «Nesıelik turǵyn úı» jeńildik nesıelik baǵdarlamalary boıynsha bastapqy tólem úshin nomınaly 1 mln teńge bolatyn eki myń qaıtarymsyz turǵyn úı sertıfıkatyn berý týraly sheshim qabyldandy», - dedi spıker.
Turǵyn úı sertıfıkaty jetim balalarǵa, kópbalaly otbasylarǵa, múgedek balasy bar otbasylarǵa, 1 jáne 2 toptaǵy múgedekterge beriledi. Aıta keterligi, 2 shildeden 17 tamyz aralyǵynda 127 ótinim qabyldanyp, maquldandy.
