Almatyda bıyl 56 myńnan astam jumys orny qurylady

ALMATY. QazAqparat –Almaty qalasy áleýmettik ál-aýqat basqarma basshysynyń orynbasary Danııar Álkebaıuly men Almaty qalasy kásipkerler palatasynyń dırektory Narıman Ábilshaıyqov halyqty jumyspen qamtýdy jaqsartý barysynda atqarylyp jatqan sharalar týraly aıtyp berdi, dep habarlaıdy QazAqparat tilshisi.

«Biz bıylǵy jyly barlyǵy 56 myńnan astam adamdy jumyspen qamtýdy josparlap otyrmyz. Onyń 26 myńy «Jumyspen qamtýdyń jol kartasy» memlekettik baǵdarlamasy aıasynda ornalasady», - dedi D.Álkebaıuly.

Onyń aıtýynsha, bos oryndarǵa ornalasý úshin jumys izdeýshiler jumyspen qamtý ortalyǵyna barý kerek.

«Ortalyq mamandary biliktilik boıynsha qandaı jumystyń qajet ekenin, qaı aýdannan usynylǵanyn, jumystyń yńǵaıyn jan-jaqty qarastyryp, vakansııalardy usynady. Lokatsııalyq jaǵynan turǵylyqty mekenjaıy nazarǵa alynady. Ásirese,kópbalaly analarǵa qolaıly nusqalar tańdalady», - dedi ol.

Basqarma málimetterine sáıkes, aǵymdaǵy jyldyń basynan beri halyqty jumyspen qamtý ortalyǵyna 27 myńnan astam adam jumys izdep kelgen, olardyń ishinde 13,5 myńy eńbekpen qamtyldy.

«Eńbek» nátıjeli jumyspen qamtýdy jáne jappaı kásipkerlikti damytý baǵdarlamasynyń aıasynda kásipkerler úshin 3 yntalandyrýshy tetik qoldanylady. Bul: qoǵamdyq jumystar, áleýmettik jumys oryndary jáne jastar tájirıbesi.

«Eger kásipker jumys izdeýshini qoǵamdyq jumystarǵa qabyldaıtyn bolsa, onda memleket árbir jumysqa turǵan adam úshin jyl sońyna deıin eki ret tómengi jalaqy tóleıtin bolady. Ol áleýmettik salyqtardy ustamaǵanda 85 myń teńgeni quraıdy. Qoǵamdyq jumystarǵa qamtylý uzaqtyǵy 12 aıǵa deıin», - dep túsindirdi N.Ábilshaıyqov.