Almatyda bıyl 56 myń jumys orny ashylady

ALMATY. QazAqparat –Almaty ákimi Baqytjan Saǵyntaev óziniń Instagram-daǵy paraqshasynda megapolıste jumysqa turý júıesiniń qalaı atqarylatyny týraly beınerolık jarııalady, dep habarlaıdy QazAqparat.

Beınerolıkte keltirilgen málimet boıynsha aǵymdaǵy jyly qalada 56 myń jumys orny ashylady. Onyń ishinde 26 myń jumys orny «Jumyspen qamtýdyń jol kartasy» baǵdarlamasy boıynsha. Osy baǵdarlama aıasynda jol jóndeý, qoǵamdyq keńistikter men basqa da oryndardy abattandyrý jobalary júzege asatyn bolady.

«Jumys izdegen qala turǵyndary qalalyq jumyspen qamtý ortalyǵyna júginedi. «Eki qolǵa bir kúrek izdegen» 27 myń azamattyń 13,5 myńy jumyspen qamtyldy. Olardyń ishinde kúzet kompanııasyna jumysqa turǵan Dına Erekeshova bar», - dep jazdy B.Saǵyntaev.

Rolıkte baıandalǵandaı, D. Erekeshova uzaq ýaqyt jumys taba almaıdy. Keıin Jumyspen qamtý ortalyǵyna júginýdi jón kórip, atalǵan mekemege barady. Munda ol qajetti barlyq keńesterdi alady jáne usynylǵan bos oryndardyń ishinen ózine kerektisin tańdaıdy. Qazirgi kezde almatylyq áıel kúzet agenttigende jumys isteıdi.

«Bizdegi «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasynda úsh baǵyt bar: qoǵamdyq jumystar, áleýmettik jumys oryndary jáne jastar tájirıbesi», - dep atap ótti Almaty ákimi.