Almatyda bıyl 50-den astam podstantsııa modernızatsııadan ótedi
ALMATY. QazAqparat – Almatyda jańa podstantsııalar salynyp, elektr jelileri men transformatorlyq podstantsııalar modernızatsııadan ótedi. Bul týraly Almaty ákimi Erbolat Dosaev Naýryzbaı aýdanynyń turǵyndarymen kezdesý kezinde aıtty, dep habarlaıdy QazAqparat tilshisi.
Almaty ákiminiń aıtýynsha, bıyl elektr jelilerin modernızatsııalaý sheńberinde Shuǵyla, Aqjar, Taýsamaly, Quramys, Rahat, Qaraǵaıly jáne Qalqaman shaǵyn aýdandarynda 56 transformatorlyq podstantsııa modernızatsııalanady.
«Onyń ishinde 21 jańasy ornatylady, sondaı-aq, 114,5 shaqyrym elektr jelisi men 35 transformatorlyq podstantsııa modernızatsııadan ótedi. Bul sharalar elektrmen turaqty qamtamasyz etýge jáne avarııalyq jaǵdaılardy azaıtýǵa múmkindik beredi. Jumystar mamyr aıynyń sońynda bastalyp, jyldyń sońynda aıaqtalady», - dedi Erbolat Dosaev.
